Ka chnong Jalaphet Bri-Sutnga da thoh ko cha u SP ka East Jaiñtia Hills yow dawa booh Police Outpost hapoh ka chnong iwa da slem wa da em i thrang ki chnong wa em cha jan tangwa na ki daw wa boon ym em man kaam i, kamtæ da yooluti wa ha kani ka kynti daw man kaam ko.
Da ong wa ki daw wa dawa Police Outpost toh wa nadooh ki chnong kam ka Khaddum, Kremmyrsiang, Narwan, Mookhain, Mynthlu toh kiwa da khreh wow em hapoh ka Jalaphet Police kiwa em bru kamwa 15,000 ngut wei kini ki chnong jngai ki kamwa 40 Km naka Police Station wa em hajan dooh kawa em ha Saipung.
Da ong wa da chem chitom ym du neidaw wa jngai kamjooh leh wa sih bha u sarok kamjooh leh wa kamwa 90% ki bru toh kiwa ym em kari.
Chooh chooh da ong wa ki kaam pyrchah aiñ nadooh ki pynyap bru, ki kaam pyrchah ya ki kynthai da ku bha ki ha kini ki snem wa da dep wei boon toh kiwa ym em pyntip cha ki pulit neidaw wa jngai ware ka Police Station iwa da pyndooh ya ki bru wow yoh ki yei hok yong ki.
Da ong leh wa ym em Bank ha kani ka thaaiñ wei da lai yachem waka Apex Bank wa yaka Meghalaya Rural Bank wow booh chnat ha Jalaphet tangwa neiliang ki Bank da pyntip ki wa nyngkong emkaam wow em ka chnat pulit cha jan, kamtæ deiwa em ka Police Outpost daw yarap bha ko ya iwa emkaam ka chnong.
Heiyatoh won wa i thaw, da pyntip wa da em kawa da pynkhreh wow e mynkna 2 Acre i thaw deiwa booh kyndon wa u khon ko toh u yoh kreh u hapoh ka Police Department.
