Jowai: Ki MDC yong ka Bharatiya Janata Party (BJP), na Ri-loom Jaiñtia, hadien wa mih khubor wa em u bru uwa tip pyrtuid kam u Tonu Dey (Gaurav), uwa ksoh kam u Finance Adviser yong ki ar tylli ki Autonomous District Council kiwa kynthup yaka KHADC waka JHADC, katwa neiliang ki MDC ka BJP wa em hapoh ka JHADC da pynsñiaw ki yei sñiaw lyngngoh neibhah ym tip ki iyi iyi yei em yong uni u Finance Adviser yong ka Council hadooh wa da mih khubor.
Uwa yahkhmat ki MDC BJP hapoh JHADC u Lakhon Biam da ong u wa neiliang ki MDC BJP kiwa chimkhia ya kani ka kaam da yachem ki ynnin ka sngi ya u Chief Executive Member ka JHADC u Thombor Shiwat hei ya emlang u Deputy Chief Executive Member u Laskey Rymbai, yow kylli chaphang ini heiwa u CEM wa kiwa emlang wa oo da ong ki wa ym tipmit ki ya utai u bru wei ka EC ym em thung ko ya uwon uwon u bru wow man kam u Finance Adviser hapoh ka Council.
Neiliang ki MDC ka BJP heiyatoh wa ini i pynemkaam bakla utai u bru ya i pyrtuid ka Council, da e yumut wow dawa na u CEM wow pynchitom wei wow kem ya utai u Tonu Dey, katkam ki kyndon aiñ. Chooh chooh ki MDC BJP da phylla ki wa kammon uni u bru nood u wow pynemkaam wot ya ka National Emblem yong ka ri India, ha ka Business Card yong oo kawa em i pyrtuid ka JHADC.
