Dawa pynchitom ka Dorbar Bah ka Seng Khasi ya kiwa pynkulmar heipor wa lai thang ya u Kulam Nongrum

Shillong: Ka Dorbar Bah yong ka Seng Khasi seiñ bei kawa man ynne ka sngi ha Seng Khasi College Shillong, da chim ya ka rai wa ka Seng Khasi Mylliem toh u yoh ko ya ka hok kam kiwi kiwa chong chnong wei kamjooh yei thaw thangbru ha Kpær Phatok ka thaw yong ka Seng Khasi kawa em ha ka chnong Madan Ïing Syiem.

Ha kani ka Dorbar da thung leh ya ka Core Committee wow bichaar hajrong iwa jia ha ka chnong Madan Ïing Syiem kawa em ha Mylliem.

U dkhot wa da rangbah yong ka Seng Khasi seiñ bei, u Khlur Sing Lyngdoh da ong u wa ka chnong ymtoh u pyrchah namo u khang ko ya ka Seng Khasi wow pyndep ko ya ka niam ka rukom wei wow thangbru ha Kpær Phatok katwa ympu yoh thaw chawi tawon.

“Ini ymtoh ka sien wa nyngkong wa mih kam ini i jia, ini da man i i sien wa le wei ka Seng Khasi ym yohsa de ko wow khut ya kani ka Dorbar Bah, khnang wym jia de neni cha khmat kamjooh cha kiwi ki thaw,” da ong u rangbah ka seng Khasi.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

Da pyntip u leh wa ha kani ka Dorbar da chim leh ya ka rai wow dawa na ki bor ka aiñ wow pynchitom ya ki bru wa emkti wow wanrah yei kulmar ha ka 11 tarik uni u bnai ha ka sngi wa lai thang ya i metyap u dkhot ka Seng Khasi, u Kulam Nongrum.

“Kat itu i dai sarom, i dawa i wa ka aiñ toh pynchitom ya ki bru kiwa emkti wow wanrah yei kulmar,” ong u Lyngdoh.

Hawa jubab wa ka Seng Khasi dawa ko wow pynchitom ya u rangbah shnong ka Madan Ïing Syem, u Hamphel Khyriem, neiliang u rangbah ka Seng Khasi da ong, “Kani chong ko ha ka aiñ wa ka takit wa oo emkti u namo ym em heitai i jia.”

U Lyngdoh leh da ong u, “Kam ka jaitbru wa tip ya ka hok i toh wow yait i na i pynkulmar wei ka Seng Khasi em hok ko wow yoh u leh ya ka niam ka rukom da iwa laitlooid”.

Da kyntait u leh yeiwa ong u Rangbah Shnong wa da em ka soi soskular wa ym thangbru de ha ka tai ka thaw neibhah man ko du ka yathoh hapyrdi ka chnong wa kawi ka manyung na ka kur Nongkhlaw.

Katwa neiliang yong president ka Seng Khasi Mylliem, u Arwel Rynjah da ong wa daw lai rah ya kani ka rai yong ka Dorbar Bah ha u Deputy Commissioner ka East Khasi Hills u Peter Dkhar ha kini ki sngi.