Ka seiñ JSU seiñbei da thoh ko cha u SP ka West Jaiñtia Hills wow kyntu ya ka chnat pulit wym toh u e laad ya ki Truck wa lai ha ki sarokbah wow yaknieh kulmar u lai chakhmat wei ini da booh ko hei eh ya u paidbah kiwa lai wa wan na u jooh u sarok.
Ka seiñ da ong ko yeini deiwa kdaw yei sahkut ki kari khak-khak ha u sarok na Shillong-Jowai wa ha ka thaaiñ Amlarem-Nongtalang neidaw wa lai ki Truck khlem da pyrkhat de ya ki paidbah kiwa lai wa wan na u jooh u sarok wei ka seiñ da dawa ko wa toh u pynchitom lada chem ya ki Truck kiwa yaknieh lai chakhmat wei ka chnat pulit toh u chimkhia bha ki yow lait ki paidbah wow chem chitom khamtam kiwa lai chim dawai næ phah sumaar cha ki Hospital wa kiwi kiwi de ki kaam wa jhan.
Kiwa yahkhmat ka seiñ hadien wa da yoh ki wow yaklam wa u SP ka West Jaiñtia Hills da pyntip ki wa i jia sahkut kari toh wa sih ki Truck ha sarok wei da booh ko hei eh wow pynlai bait ya ki kari neibha u sarok bah na Shillong-Jowai man u uwa khian palat.
Kiwa yahkhmat ka seiñ da kyntu ko leh ya ka sorkar wa da toh i por wow thooh laad, thooh luti wow pynheh noh ya u sarok Shillong-Jowai neibhah ki kari kiwa lai na uni u sarok da boon palat ki khamtam ki Truck wei u sarok da khian palat u.
