Ka TUR wa ka KAM Meghalaya da beiñ joor ki ya ki kaam dat bru wei pynkulmar iwa da jia ynnin ka sngi ha ki sarok yong ka thaaiñ GS Road, Dhanketi ter-ter da ki bru wa chongchit kiwa da chimbynta ha ka Rally neibynta wow yoh kreh wa da man ha Shillong da ka FKJGP.
I pynkulmar wei dat bru da kiwa lai Rally man i wym ye wow pdiang iwa da booh ya kiwa lai luti khamtam ki kynthai wa ki khynnah hei maa wei syir.
Iwa phylla chooh chooh wa ym em ki bor sonteri na ki pulit kiwa synraan ya kiwa lai Rally wei ini i kheiñstiñ yong ki bor District wa ki pulit toh iwa ym kheiñkor ya kiwa chong chnong. “I beiñ joor i yeiwa kheiñstiñ ki bor ka aiñ wei toh wow pynchitom ya ki sahep pulit wa ki Magistrate kiwa toh u pait yei lai Rally,” da ong ka TUR waka KAM.
Chooh chooh da ong wa iwa jia ynnin ka sngi man kamwa ka sorkar embynta lang ko wei thmu ko wow pynmih yei kulmar. Ini ye u man i buit Election yong ki seiñ saiñ hima kiwa em ha ka sorkar wow pyntieñ ya ki bru.
Kani ka sorkar wa yahkhmat da ka NPP, UDP, PDF, HSPDP, BJP wa ki MLA samen da rem lut ki ha waroh ki liang wei ini i kulmar ye wow man wa da leh chynnam khnang wow pynmylliñ ya i wymhoi yong ki.
Sa chisien ka TUR waka KAM Meghalaya, da beiñ joor ko ya ka sorkar MDA wei da kyntu ko ya ka kasari wow kylli ya ka sorkar hajrong i wym ye wow khoom u kdoh ya ki kaam pynmynsoo wei wow pynkhreh chwa neibynta kani ka Rally.
