Jowai: Ka seiñ East Jaiñtia Hills Driver Association (EJHDA), hapoh i yahkhmat u Lambormi Dkhar, President wa u Gerald Phawa, General Secretary ka seiñ da sylli ki ya kawi ka thaw kawa jooh jia i ya tyrrah kari khak khak kawa em i bynta wa dong bha kawa haap ha ka chnong Umtyra East Jaiñtia Hills District, wei hajrong ini da lai booh ya ka dorkhat ha u Project Director yong ka National Highway PIU Shillong.
Ha i lai sylli, ka seiñ da chem ko wa ha katai ka thaw na i por cha i por jia ki jia wa sñiawsih du na i daw wa katai ka thaw da chna tang dep,wei na i liang ka seiñ da kyntu ko ya ki bor District wot chadooh ki bor wa toh u pait ya utai u sarok, ka NHAI, tangwa hadooh katni ym em da leh iyi iyi, kamtæ na i liang ka seiñ ki Driver Association da ong wa lada ki bor wa pait ym leh ki ya iwa emkaam, ka seiñ daw lai yaklam ko cha ki bor wa haneiñ neibynta wow yada ya ki paidbah wa lai wa wan wei kamjooh ya kiwa chong wa sah ha katai ka thaw.
Ha i yaklam wa u heh ka Company, neiliang yong oo da ong u wa da pyrchang wow booh ya ki Speed Breaker, tangwa ini dangbooh yei maa hi ya ki kari wa lai wa wan, kamtæ neiliang yong kiwa yahkhmat yong ka EJHDA da kyntu ya ka NHAI wa toh u pynbait ya utai u sakor wa dong wa booh yei maa man i por ya kiwa lai wa wan lyngba utai u sarok bah.
Neiliang kiwa yahkhmat ka seiñ da kyntu ki leh ya ki bor ka NHAI wow pynbha ya ki sarok kiwa dangchna kiwa ye u wanrah yei maa ya kiwa lai wa wan.
Discussion about this post