Ka Khasi Students’ Union Nangbah Unit ha ka 8 tarik uni u bnai hapoh i yahkhmat yong u President, u Morningstar Pasi wa u Organising Secretary, u Sundayborn Thubru deiwa synraanlang u Ohibait Dkhar, President KSU Jaintia Hills District Unit da lai yachem ki ya u Superintending Engineer, PWD (Roads) Jowai Circle, Jowai deilang wa i thoh yow paan yarap neibynta wow pynchna ya u sarok JNKK nadooh 0-7 KM.
Ka seiñ ha i thoh da pynkynmoo leh ya ka yung krehkaam wa ya utai u sarok dep pynchna dang u snem wa dep tangwa katni won utai u sarok dang sih chooh chooh u.
Ka seiñ da kdaw chooh chooh ko wa ya utai u sarok da pynemkaam ym du da ki khon yong ka chnong Nangbah tangwa da kiwa boon ki chnong kiwa marjan wa kiwa lai lyngba uni u darok.
Kamtæ neiliang u sahep ka chnat da kular u wow phah ya ki wakreh wei kamjooh ya u SDO wow lai pait deilang waka seiñ yow ye u pynbait yow leh yeiwa emkaam.
