Ka Joint Action Committee against Umngot Hydro Electric Project kawa kynthup ya kiwa chong chnong ha tymbud ka Wah Mynngot, ynne da e dorkhat ko ha u montri rangbah ka jylla wow dawa pyndam noh ya i thmu wow kreh ya ka Umngot Hydro Electric Project næ wow kreh pynmih bordiñ na kani ka wah.
Ka Committee da ong ko wa neini chaphrang ym pdiang de ko ya iwon iwon i jait yaklam næ i pynche pynsñiaw paidbah hajrong ini i kaam la neiliang ka sorkar næ ki Company kiwa wan sylli ya ini i thaw.
Da kdaw ko leh wa da thoh ya ka chithi pyrchah ya ini i thmu heiwa da thoh cha ki chnat sorkar waphær waphær wa kynthup ya ka chnat Meghalaya State Pollution Control Board kawa da pynlai ya i pynsñiaw paidbah (Public Hearing) chirup wa ka MeECL.
Chooh chooh da kdaw ko leh yei maa wa i doohnong wow mih lada kreh ya kani ka Project heiwa daw sepai lut ki thaw rep ha chi lynter ka Wah, i dooh noh ya ki thaw uiñke suwari, i oor khyndaw, chlai um, i chah ktah lada khih khmi, i dooh noh ya ki khloo, ki mrad wa ki dohum wa ha rukom.
Da ong ko leh wa kani ka Wah man ko ka Bei yong kiwa boon kawa da psa ya ki na ki por nachwa wei ym em de kiwa ye u su salan ya ka Wah Mynngot.
Kamtæ hajrong kini kiyi kiyi ka Committee da raikut ko wow pyrchah wei wow dawa na ka sorkar wow pyndam noh ya ini i thmu yong ka.
