Ki paidbah wa chong chnong ka Jarain da pynche ki hajrong i pynbaad u Ami Tariang wa u Jingieit Nongbah heiyatoh wa i mih paidbah wow pyrchah ya u Dolloi ka Elaka Amwi u Jemewell Pyrtuh deiwa pynche wa palat 90% kiwa chong chnong ka Jarain, West Jaiñtia Hills da mih ki cha sarok ha ka 17 tarik uni u bnai neibynta wow yieñ pyrchah yei leh embor wei thombor u Dolloi ka Elaka Amwi deiwa thung Acting Waheh Chnong ya u Ami Tariang ha Jarain khlem da i mon yong ki paidbah.
Da ong leh wa ki paidbah da rah ki ya ki Banner ki Placard deilang wa i thoh wow pynsnñiaw yei pyrchah ya u Dolloi, ya u Acting Waheh Chnong uwa ya u Acting Secretary Chnong u Jingieit Nongbah.
Da ong leh wa i kam kini ki arngut kitæ u Acting Waheh Chnong wa u Acting Secretary Chnong wa em du 100 ngut ki paidbah wa mih toh iwa bakla heiwa da em palat 700 ngut, wei kini ki arngut lada kam ki leh kam kiwa yahkhmat chnong ym em wa kyrchaan wa bood ya ki uwi leh.
Kini ki arngut da pynbaad ki leh ya u Kliarbha Sana wa ya u Skhemtriang Pohti tangwa toh u tip wa kani ka yakhih toh i yong ki paidbah.
Wei i dawa yong ki paidbah toh ya u Jemewell Pyrtuh (Dolloi) uwa thung ya u Acting Waheh Chnong yabor ha chnong Jarain wow pyndam noh chisyndon ya u Ami Tariang kam u Acting Waheh Chnong da u Dolloi.
Da ong leh wa ym em kam itæ i pyrchah chnong ha Jarain kamwa da pynbaad wei uwa pyrchah chnong wa nyngkong dooh toh u Dolloi uwa synchaar yak Elaka deilang wa ki kattu katni ngut ki bru yong oo ha Jarain wow yoh u ksoh ya ki kaam hapoh ka chnong ka thaw neibynta i myntoi wa samen yong ki.
