Ka seiñ Jaiñtia National Council (JNC) da yachem ko ya u DC ka East Jaiñtia Hills District wow pyrchah ya ka Public Notice namo i pynbna paidbah u R Nainamalai, Member Secretary ka Meghalaya State Pollution Control Board, Shillong wa daw pynman ya ka pynsñiaw paidbah namo ka Public Hearing neibynta ka M/s Meghalaya Cements Ltd waka M/s Green Valley Industries Ltd wa em ha East Jaiñtia Hills District, heiwa da yohbor Environmental Clearance na ka ‘State Environment Impact Assessment Authority’ wow pynneh ya i pynmih khyndaw-bilat wa Clinker namo ka Cement Clinkerisation Plant na ka 2600 TPA (0.858 Million MTPA) cha ka 4500 TPD (1.485 Million TPD) kamjooh ka 10MW CPP wa 9.5 MW WHRS ya ka M/s Meghalaya Cement Ltd ha Thangskai, East Jaiñtia Hills District, Meghalaya wa i tih mooslait ha i thaw wa heh 4.77 Hectare ha Brichyrnot, East Jaiñtia Hills District ya ka M/s Green Valliey Industries Ltd, heiwa ya kani ka Public Hearing u pynman ha ka 24 wa 25 tarik uni u bnai.
Heiyatoh wa ini i pynsñiaw paidbah da pyrchah joor da ka JNC ha kini ki ar sngi. I daw wa pyrchah ka seiñ ya kani ka pynsñiaw paidbah toh wa kini ki karkhana ymye ki wow pynhun ya i emkaam ki paidbah ka thaaiñ wa ka District khamtam hei yoh kreh kiwa dadep puræ neibhah katkam wa man katni duna bha kiwa yoh kreh ha kini ki karkhana. Wei ki kreh da yoh bait da ki bru wa na baar jylla nadooh ki heh hadooh ki khian.
Ka JNC da pynsñiaw ko leh wym em u yoh bhah kreh ki bru na ka jylla ha kini ki karkhana neidaw wym em booh bhah yei kreh ya ki tre chnong chwa.
Heiyatoh wa ki kaam pynroi ha kini ki chnong ki thaw duna bha i yoh yarap ki na kini ki karkhana hanlada em ka Corporate Social Responsibility (CSR).
Chooh chooh da ong ko wa ki Contractor wa man tre jylla wa kiwa khayi mar cha kini ki karkhana nadooh ki mooria, ki moo-it, u mooyong, u moochuni, u chyiap wa kiwi kiwi da pynslem wow su ya ka poisa cha ki wot hadien wa da yachem boonsien wei ini ym du ktah i ya ki Contractor tangwa wot ki mistri wa kiwa kreh mylla leh kamjooh.
Ka seiñ da ong ko leh wa i pynheh ya ka Clinkerisation da ka M/s Meghalaya Cements Ltd wa i tih mooslait da ka M/s Green Valliey Industries Ltd daw ktah i ya ki khloo wa kamjooh ki talawiar ka chnong khamtam wa man ko kam ka Eco-Sensitive Zone wa jan waka Narpuh Wildlife Sanctuary, Sonapur, East Jaiñtia Hills District wei ini daw ktah i ya ki mrad wa ki sim ki doh wa em ha kini ki khloo.
Khaddooh da ong wa ini i leh ki karkhana daw pynjakhlia i ya ki um ki wah wa kamjooh ki dohum wei daw bood won sa i oor khyndaw.
Kamtæ ka seiñ da dawa ko wow pyndam noh ya kini ki Public Hearing.
Discussion about this post