Ka KHNAM-State Youth Wing da thoh ko cha u Chief Secretary ka Meghalaya yow dawa pyndam yaka Public Hearing ka Star Cement kawa da thmu wow pynman haka 21 tarik uni u bnai ha pchem ka yung krehkaam u DC ka East Jaiñtia Hills.
Ka Youth Wing da ong ko leh wa ha u snem 2019 da hap wow pyndam ya kani ka Public Hearing la ar sien neidaw wa pyrchah ki paidbah, kiwa chong chnong wa ki seiñbhalang yei thmu tih moochuni na chnong Brichyrnot, East Jaiñtia Hills ha i thaw wa heh hadooh 42.015 Ha.
Chooh chooh da ong wa i pybna u DC wow chah du 100 ngut ki bru wow chimbynta ha kani ka Public Hearing man ko kawa ym ye u pdiang wei kawa man leh yei pyrchah yaka yurim ka Environment Impact Assessment heiwa da tip ya kini kam ka pynsñiaw paidbah ym toh i pynsñiaw yong samen samen.
Da ong leh wa i thaw wa thmu wow tih ya u moochuni da em i du 1.46 Km naka Wildlife Sanctuary wa 0.25 Km naka Eco Sensitive Zone wa 1.38 Km naka wah Lukha.
Kamtæ da ong wa hadooh ka Supreme Court leh da ong ko wa i hok yow yoh u im katkam ka Article 21 ka Constitution kynthup ko leh yei hok wow im haka soodong sookun kawa lait nei tngit i jakhlia.
