I booh ki chipai yei maham ha ka kynroh deiwa thoh ‘Trespassers will be shot’ iwa mut wa kiwa lai khlem yoh bor na ki thaw chipai daw siat ya ki da, pynsmiej i ya ki paidbah wa chong chnong kiwa em marjan wa i thaw ki chipai. Ya ini i thoh da yoo hei chram i thaw ki chipai ka Indian Air Force kawa em ha ka chnong Rngi Shyllong.
Yow pynsñiaw ya ini i sñiawkhia hajrong ki kyntien wa da pynemkaam wow maham ya ki paidbah, u MLA ka Nongkrem, u Lambor Malngiang ynne ka sngi da wanrah u yei yatai wa kyrpang (Short Duaration Discussion) hapoh ka yung dorbar chna aiñ ka jylla, heiwa da dawa wa ka sorkar toh u chimkhia hajrong ki kyntien wa da thoh.
Da pynsñiaw u leh wa kiwa chong chnong ki wym tip u puræ puthi ki wym sñiawthooh yeiwa da thoh lada lai bakla ko wow lai cha yaw na katai ka thaw daw chah siat yap katkam wa da maham.
Hawa jubab hajrong ini, neiliang u Montri Rangbah, u Conrad K Sangma da pyntip u wa ka Deputy Commissioner da yoh ko ya ka ujor na ka seiñ FKJGP, heiwa neiliang ka DC da paan pynche ko na u Commanding Officer ka Eastern Air Command, heiwa ha 7 tarik u Thohlakhmi (Feb) da yoh ya ka jubab na u PRO wa itai i thoh ym toh wow pynkhor tangwa du wow maham wei wow pyntip iwa da jooh leh ha waroh ki thaw wa sah ki chipai yow yada na kiwa choon.
U Montri Rangbah da pyntip u wa katkam i jubab wa da e da u PRO ki chipai, da ong wa itai i maham da mih hadien i chah hiar thma ki ktem chipai ha Pathankot, Samjuwan wa kiwi ki thaw ka ri, wei hadien itai i jia da phah ya ki chipai wow pynrkhiñ wei wow pynkhlan yei yada wow khang leh ya kiwa choon wow psiah cha ki thaw yong ki chipai.
U Conrad da pyntip u leh wa neiliang u Officer In-charge ka Mawngap Police Station deilang wa kiwa yahkhmat ka chnong wa ki khynroo da yachem ki ya u Air Marshall ka Eastern Air Command wow yaklam hajrong itai i maham, heiwa u Air Marshall da pyntip u ya kiwa yahkhmat chnong wa u OC wa da booh ya katai ka maham katkam i phah ka Air Force Head Quarters wei toh neibynta wow yada na kiwa choon.
Hajrong i pynemkaam ya ki kyntien kiwa khor, u Montri Rangbah da ong u wa ym toh iwa suk wow pynbait du da ka sorkar jylla, tangwa neiliang ka sorkar khlem da kular daw pyrchang ko wow yaklam ya ini waka Defence Ministry.
