Ka KSU ha ka kyrwoh wa da phah da ong ko katkam i pynbna yei pyrtuid kiwa yoh bhah wow lai puræ MBBS yong ka jylla Meghalaya lyngba ka State Quota, da em boon kiwi won ki jaitbru kiwa yoh psiah ha ka Open Category.
Na ki 14 ngut kiwa chah jied wow leh Screening, da em du le ngut ki tre ri namo ki jaitbru ri-loom katwa 11 ngut won toh kiwa na kiwi won ki jaitbru ki wym toh ki jaitbru ri-loom kitæ wa em ha u Serial No. 1 hadooh 5 wa 8 hadooh 13.
Ka seiñ da yoh ujor ko leh wa ye u man wa kitai ki 11 ngut ymtoh tang kiwa na ka jylla Meghalaya tangwa kiwa na jylla Assam. Da suba leh toh kiwa yoh ya ki kot ki sla na ka chnong Ampati, South West Garo Hills. Hajrong ini i kynrum kynram, ka KSU da paan pynche ko na ka sorkar jylla lada kini kiwa chah jied toh sakhiat ki nong Meghalaya.
Ka KSU da dawa ko leh wa ka sorkar jylla toh u pynyoo paidbah ko ya ki Aadhaar Card wa EPIC yong kitai ki 11 ngut lada toh sakhiat ki nong Meghalaya wei kamjooh leh na kiwon ki College wa pyndep ki yei puræ puthi.
“Ka Open Category toh neibynta waroh ki nong Meghalaya wa kynthup leh ya ki Scheduled Tribes ka jylla wei boonsien boon ngut ki Khasi da yoh ki wow psiah ha kani ka thup kawa wai luti ya kiwi wow psiah na ka Khasi-Jaiñtia Category. Itai i yoh psiah da kini ki 11 ngut da pynsuba ko wa kini toh kiwa na baar jylla iwa da pyndooh laad ya 11 ngut ki Khasi, ki Jaiñtia wa ki Garo kiwa thrang wow yoh lai puræ MBBS.
Discussion about this post