I khih khohreh yong ki seiñ saiñpyrthai kiwa hapoh ka ri-loom Khasi wow yaklam hajrong ka aiñ bhah kreh da pteiñ i, wei hadien yong ka UDP neiliang ka Hill State People’s Democratic Party (HSPDP) leh da rai ko wow yaklam hapoh ka sorkar neibynta wow pynthymme biang ya ka aiñ bhah kaam lane ka Reservation Policy.
Ka HSPDP kawa man ka seiñ kawa yakrehlang ha ka sorkar MDA-II, da chim ko ya kani ka rai ha ka yalang yong ka Central Executive Committee kawa da pynman ynne ka sngi.
Hawa klam wa ki laad pathai khubor, u President ka HSPDP, u KP Pangniang da ong u wa ka Party da booh ko ha ka kular krehkaam yong ka Party ya ka phang wow pynbait thymme biang ya ka Reservation Policy, wei da chim katni ya kani ka rai wow yaklam biang wa waroh ki liang wa em ha ka sorkar synrop la ha ka yalang yong ka MDA Coordination Committee lane ha ka yalang wa waroh ki seiñ saiñ pyrthai wei wow kyntu ya u Montri Rangbah, u Conrad K Sangma wow pyrkhat neibynta wow pynthymme ya ka Reservation Policy.
