Ka seiñ wa tip kam ka Knowledge Innovation and Agricultural Science Network (KISAN) kawa na West Garo Hills District da phah dorkat ko cha u Montri Rangbah ka Meghalaya yow dawa yei bhah ki Dkhar kiwa da man kam kiwa chong chnong wa pura ka Meghalaya wa ki leh toh ki yei hok ym du hapoh ka Reservation Policy tangwa wot wow man kam ki tre thaw hapoh ka jylla.
Ki yurim wa da e ki toh wa nachwa waroh kawi ka thaaiñ North East em ki hapoh ka Assam kat hadooh u 1963 heiwa da sdang pynkha ya ki jylla kam ka Arunachal Pradesh, Mizoram, Nagaland wei ya ka Meghalaya ha u 1972 deiwa jied ya ki Khasi, Jaiñtia wa Garo kam ki tre yong ki loom ki wah.
Tangwa da ong wa chwa ini ha ki bynta wa tip kam ka Plain Belt wa em hapoh ka West Garo Hills District katni, da em ki bru wa da im da sah ha kini ki thaw nadooh na warim kiwa bood yei dustur riti ki Assamese, kiwa da kyrchaan leh yei yakhih Hill State Movement deiwa booh kyndon wa ki leh toh u yoh hok ki nadooh wow jied ya kiwa mihkhmat, i khih i khan, i thaw i bhaw, ka khayi pateiñ tangwa kiwa boon na kini ym em da yoh ki kamwa da kular.
Da kdaw ki wa hapoh ka jylla na ki 60 tylli ki Assembly Constituency, da em 5 tylli donhi kiwa man kam ki Un-Reserved wa ye uwon uwon wow yieñ yaleh Election kitæ ka 14-Pynthorumkhrah, 18-West Shillong, ka 19-South Shillong, 46-Phulbari, 47-Rajabala tangwa ha Pynthorumhrah, West Shillong wa South Shillong won ki bru wa chong chnong toh 95% ki jaitbru ri-loom, kamtæ iyi mut wow pynman ya kini kam ki Un-Reserved.
Hajrong ini da dawa wa ya ki Un-Reserved Constituency toh u man ki ha ki thaw wym em boon ki jaitbru ri-loom kam ha ka 54-Mahindraganj, 48-Sella waka 45-Tirkrikilla deiwa e daw leh wa lada ha ki Un-Reserved Constituency dang jop hi da ki jaitbru ri-loom, ym em yumut neibhah ki wym toh ki jaitbru ri-loom ym yoh ki ya uwa mihkhmat yong ki wei da dawa leh wow booh ya ka Parliament Seat yow yoh ki wym toh ki jaitbru ri-loom ya u MP wow mihkhmat hapoh Parliament.
Heiyatoh won waka Reservation Policy kawa da bhah 40:40:5:15 (Khasi-Jaiñtia:Garo:SC:General), da ong wa ki General deilang wa ki SC ym jooh em yoh ki yei bhah nadooh wa sdang ya ka MPCS ha ka 14-09-1972 wei da yoo lakam wa leh chynnam yow pyndooh bhah ya ki SC wa ki General. Kamtæ da ong wa ya ka Reservation Policy toh u pynkylla ka wei lyngba ka Roster System waroh kiwa da dooh bhah toh u pyndap ki wei ymtoh u e cha kiwi lada ym em ki SC lane ki General wa yaleh ya kini ki kreh.
Hajrong won yow ye u thied thaw da ong wa hanla ka Meghalaya em ko hapoh ka 6th Schedule, kiwi ki jaitbru kiwa man kam ki tre chnong hanla ki jaitbru ri-loom lane ki wym toh ki jaitbru ri-loom ym yoh ki ye hok wow man kam ki tre thaw, kamtæ ini toh u kylla noh i.
Heiyatoh won wa i khayi pateiñ, da ong wa ki kam ki tre chnong ka Meghalaya neidaw wym man ki kam ki jaitbru ri-loom da hap ki wow su dan cha ka sorkar hanla ki da tkhoh chwa i hok wa yoh ki nadooh ki Scheme ka sorkar jylla wei ini leh toh u yoh yarap ki deiwa man salonsar. Chooh chooh da ong leh wa wow yoh Trading License ya ki, man ko iwa eh wei kawa lutsan hanla ki da man ki kam kiwa chong chnong ka jylla. Kamtæ ya ini leh da emkaam wow pynkylla yow pynsuk noh neini chakhmat.
Ya kani ka dorkhat da phah leh cha u Prime Minister, u Home Minister, cha u Minister ka Law & Justice wa cha u Minister ka Ministry of Social Justice & Empowerment ka sorkar India.
