Ka seiñ KSU-EJHDU ynne da yoh ko wow lai pynsñiaw ya ar tylli ki phang wa emkaam hapoh ka East Jaiñtia Hills District deiwa yachem wa u Deputy commissioner yow dawa pynlait smat yei e yarap cha kiwa chah ktah ha ki bor ka ramaw wei wow dawa yasoi soskular Memorandum of Agreement wa ki Company, ki karkhana wa em ha ka thaaiñ deilang wa ki bor District yow thung kreh ya kitu kiwa pyndep yei chah sikai ha ITI Khliehriat kawa daw sdang noh.
Ka seiñ da pyntip ko ha u DC wa da em boon ki bru kiwa da ujor cha ki neidaw wym yoh yaka poisa yarap hadien wa chah ktah hei bor ka ramaw heiwa u DC da pyntip u wa da yaleh ki wow pynlait smat ya ka poisa wei da em ka poisa wa da booh cha hapoh ka District kawa Rs. 20 lak yow e yarap smat cha kiwa chah ktah.
Da ong u wa i daw wa slem u pynlait poisa ha ki snem wa da dep toh neidaw wa ka mang tangka wan bait ko na ka chnat Revenue wei ki bor District ym pu yoh bor pura ki wow e bait wut-wut cha kiwa emkaam yarap tangwa katni won da phær i rukom pynlai wei da ye u pynsmat neidaw wa da e bor ha ki DC wow leh yeini i kaam.
Neiliang ka seiñ da tip ko leh wa kini ki bru wa chem chitom kam ini i jia da hap ki wow ujor FIR yeiwa da jia wei hap ki leh wow yoh yaka Damage Certificate na ki bor wa toh u pait næ ki waheh chnong wei hap ki leh wow riñ Video wei wow chondur yeiwa chah ktah.
Heiyatoh waka ITI Khliehriat kawa daw sdang noh ha uni u snem ka seiñ da yooluti ko wym thut i sdang wei deiwa soi sorkular thung kreh wa ki Company wa em hapoh ka District daw yarap ko wow yoh kreh kitu kiwa pyndep yei chah sikai nadooh wow leh Welding, Mechanic wa kiwi kiwi de.
Discussion about this post