Ka seiñ East Jaiñtia National Council (EJNC) hadieñ wa da yoo ko lyngba ki laad pathai khubor wa ka sorkar jylla da kyrriah kaam ko yaki kattu katni ngut ki Superintendent of Police (SP) yong ki District waphær waphær kiwa kynthup ya u Vivekanand Singh u SP ka East Jaiñtia Hills District, wow thung won da u Deepak Kumar Palecha, IPS kam u SP wa thymme yong ka East Jaiñtia Hills District.
Neiliang ka EJNC da ong ko wa ym em pyrchah ko yei chah kyrriah kaam yong u SP warim ka District, tangwa ka seiñ da pyrchah joor ko yei thmu yong ka sorkar wow phah noh da u Deepak Kumar Palecha IPS, kam u SP thymme ka EJHD.
I pyrchah yong ka seiñ toh hajrong ka yurim wa ka EJNC kam kawi na ki seiñbhalang napoh EJHD, kawa peit yei khia yei chon yong kiwa chong chnong yong ka District. Da sakhi ko em chiboon i ya sñiawthooh bakla wa i eh wa ki paidbah ya tyngkhooh ki du neidaw wym ya sñiawthooh ha i ktien i thylliej, neidaw wa dang boon kiwa chong chnong yong ka District dang chem chitom ki wow klam da i ktien phareng næ Hindi.
Kamtæ ka EJNC da kyntu ko yaka sorkar jylla wow phah noh da ki tre jylla, khamtam da kiwa ye u klam yaka ktien Khasi, ktien Jaiñtia wow man kam u SP wa thymme yong ka EJHD, neibynta i myntoi yong kiwa chong chnong yong ka District.
Ka kyrwoh na u Sambormi Lyngdoh, President ka EJNC- CEC.
