Jowai: Ka Hills Farmer Union (HFU) lyngba ka RTI na ka yung krehkaam ka Water Resources Department, West Jaiñtia Hills District, Jowai da chem ko wa da pynkreh khalær ya ki Scheme kam ki Minor Irrigation, neibynta ka Laskein C&RD Block yong u snem 2017-2018 wei man ki kiwa da pynkreh tangdep.
U President ka HFU West Jaiñtia Hills District, u Kerlang Shylla, da ong u wa ki Scheme kiwa kani ka chnat sorkar pynkreh tangdep ko kynthup ki ya ka Rahoh MIP, Pynthorwah MIP wa ka Umkynruh MIP, ka seiñ lyngba ka RTI da chem ko wa boon na ki thaw wa da kreh ympu pyndep ya ki hadooh ynne wei kiwa dadep leh ym pynkreh ya ki katkam ka poisa wa da mang.
Neiling u Kerlang da ong u leh wa wot ki pyrtuid yong kiwa yoh myntoi (Beneficiaries) leh da pyndap da kiwa ym em wot tang i thaw rep leh wei da chem leh wa u jooh u bru mih pyrtuid u ar le sien wei i rukom soi pyrtuid won phær i.
Da chem ko leh wa em ki bru ki wym yatoh i pyrtuid wa i kur na ka jooh ka chnong, kamtæ ka seiñ da kylli ko kammon ki jooh ki bru mih pyrtuid ki ar le thaw katwa i rukom soi pyrtuid won yaphær i.
Neiliang ka seiñ ha i yachem wa ka sahep (Engineer) ka chnat da ong wa ya ki pyrtuid kiwa yoh myntoi da e da u waheh chnong khlem kawon kawon ka Survey.
Iwa phylla ya ka seiñ toh wa kani ka sahep da phah leh ko ya ka Survey hadien wa da paan ya ka RTI kamtæ ka seiñ da kyntu ko ya ki bor wa toh u pait ya ini wow pynman noh da ka takit namo ka Enquiry khnang wow pynbait ya i rukom pynkreh hok ya kani ka scheme neibynta i myntoi ki paidbah.
Ka HFU da pynkhreh ko leh wow lai ujor noh hakhmat u Farmer Commission K.N. Kumar Ex. IAS (Commissioner of production Agriculture Department) hajrong ini waroh.
Discussion about this post