Ka Hynniewtrep Youth Council (HYC) Shillong City ynnin ka sngi da phah ko dei thoh cha u Director of Health Services (MI) u Dr. Aman War yow paan pynche wei dawa takit hawa yatoh wa i khlaad noh kawi na ki Staff Nurse kawa kreh ha Ganesh Das Hospital Shillong kawa tip pyrtuid kam ka Manisha Turnia kawa 32 snem i rta na u khñiang COVID-19.
Ka seiñ da pynsñiaw ko wa katkam ka yutip wa da yoh lum, da kam wa katai ka Staff Nurse kawa pynkhon kamwa 6 bnai, da lai kreh bait ko kamwa jooh man tangwa ha kini ki kajiak sngi da pynsñiaw ko cha ki bor wa haneiñ wa ym khlan wei da paan chuti ko wei neiliang ki bor wa toh u pait yong ka Ganesh Das Hospital da kyntait ki wow e chuti wei phah kreh bait ki ka iwa pynyoo wa duna wakreh ki.
Neiliang ka seiñ da kylli ko wa lada ya ki kyndon (Protocol) wa da pynmih daka chnat i chait i khiah heiyatoh wa kiwa punkhon wa ye ki u wow chim chuti wei kreh na yung, wei kammon ka chnat i chait i khiah kawa pynmih hi ya kani ka hukum tangwa pyn ka hi kawa kheiñstiñ wei kyntait wow e chuti wei phah wan kreh hanla da khang leh.
Kamtæ ka seiñ da dawa ko wow pynman yei takait wei wow pynchitom deiwa eh ya kiwa emkti wow kyntait yei paan chuti, ka seiñ da dawa ko leh na ka sorkar wa toh u su ya ka bai lutsan cha kiwa ha yung hasem yong kani ka Nurse wei wow yarap poisa man-u-bnai neibynta i emkaam i lai puræ u khong yong ka uwa dang 6 snem i rta.
ka seiñ da Maham ko yaka sorkar wa ym toh wow lehke yei mynsien yong kiwa kreh hei chait i khiah kiwa da e doh wei mynsien wow chakri wei ka sorkar toh u pynbiang wei kitkhlieh yei duna ki bru wakreh wei ym toh wow nioñ ne phah kreh yabor ya kiwa em chwa. Da phah leh ya ka khubor sñiawlem cha kiwa ha yung hasem ka Manisha Turnia wa u Blai u pyntngen wei wow emlang wa ka yung kasem ka yong ka.
