Ka seiñ JYF-EJH da e ko i kyrchaan wa pura ya ka Environmental Coordination Committee (ECC) Elaka Sutnga hajrong i dawa khang khyrdep ya ki karkhana Coke kiwa da mih kam ki tit ha Elaka Sutnga wa East Jaiñtia waroh kawi.
Ka seiñ da ong ko wa i chna ya ki karkhana Coke da man i chawa palat heiwa du hapoh Elaka Sutnga em hadooh 45 tylli wei waroh ki karkhana hapoh ka District em ki kamwa 56 tylli wei ini daw ktah bha i ya i chait i khiah katni wa ki pateiñ wow wan.
Ka JYF-EJH da e khublei ko leh ya u MLA ka Sutnga Saipung Constituency, u Shitlang Pale uwa da emlang wow kyrchaan ya i dawa ka ECC Elaka Sutnga heiwa da lai synraan u ya ki paidbah ka Elaka hajrong i dawa yong ki.
Da phylla ko leh wa wot hadien wa u DC East Jaiñtia da pynbna u wa da phah khang ya kini ki karkhana wa chna pyrchah aiñ tangwa hadooh kini ki sngi ym yoo ya ki dak wa da pynchitom ya ki.
Neiliang u J. Pala, President ka JYF-EJH da kylli u wa neiwon yoh kini ki karkhana ya u mooyong wot hapyrdi wa da khang yei tih wei wow chalan ya uni u mar poh-khyndaw heiwa ka seiñ da dawa takit ko ya ki.
Kani toh katkam ka Wyrta na u B. Chyrmang, Secretary JYF-EJH wei da kyntu ya ka sorkar jylla wow chimkhia yeini waroh.
