Dawa thung kreh noh ki khynroo khyllood wa pass Agri na ka bhah sorkar

Shillong: Ki khynroo khyllood wa dadep puræ ha ka rep ka riang na ka bhah sorkar (Bonded) da pynman ki ya ka chong kyllaiñ myngor wow dawa na ka sorkar wow thung kreh noh ya ki ha ka tnat wa kiwa dadep puræ ha ki kam ka bhah yong ki.

Kini ki khynroo khyllood kiwa em hapoh ka lama Meghalaya Agriculture Students and Graduates Association (MASGA) kiwa em kamwa 20 ngut da pynman ki ya kani ka dawa ha pchem U Soso Tham Auditorium.

U President ka MASGA, u Baiarbor Nongbri da pyntip u wa ka tnat ka rep ka riang yong ka jylla ym em thung kreh ko kattu la 10 snem ya ki khynroo khyllood kiwa katkam ka bhah sorkar (bonded) ha kani ka tnat iwa da pynman ya ki wow dawa wow leh smat ya kani ka kaam.

“Nadooh u snem 2008 hadooh katni u snem 2018 ym pu em napyrdi kiwa da Pass wa da yoh kreh katkam ka bhah wa da booh ka sorkar,” da ong u Nongbri.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

“Boon hi ki khynroo khyllood neidaw wym thung kreh ka sorkar katkam wa da puræ ki da haap kreh ki cha ki Bank, em kiwa kreh cha wa ki Company wei da em kiwa yoh kreh wa chipor (Contract Basis) ha ICAR,” da pyntip biang u.

Da pyntip u leh wa i yoh bhah man u snem na ka sorkar wow puræ man ko 8 ngut na ki Khasi-Jaiñtia, 8 ngut na Garo wa 4 ngut na kiwi won ki jaitbru wei da pynrap u deiwa ong wa da em kamwa 180 ngut ki khynroo khyllood kiwa da pyndep yei puræ wa toh i bhah yong ki kiwa ym pu em yoh kreh sorkar.

Hawa yoh u yaklam wa u Montri ka tnat ka rep ka riang ka jylla, u Banteidor Lyngdoh hajrong kani ka kaam da ong u wa ka sorkar u chimkhia wow pynbait noh ya i kynrum kynram iwa yatoh wa i thung kreh ha ka tnat ka rep ka riang ha jylla, kawa da sahkut da slem bha wei ymtoh kawa suk wow pynbait ya ini waroh du ha kini ki san bnai ya ka sorkar.

Da ong u leh wa em ka mukotduma ha yung kasari hajrong kani ka kaam kawa da ujor pyrchah da ki khynroo khyllood wa lai puræ ha kani ka kaam heiyatoh wa pynbna (Advertisement) ka sorkar wa nachwa.

“Ka tnat emkaam ko ya ki bru tangwa ymye u thung kreh neidaw wa em ka kynrum kynram ha ka kasari.” da ong u montri wei da pynrap u wa ka tnat daw pynbait noh ko ya ini waroh hapoh uni u bnai.