Ka seiñ Hynniewtrep Youths Council (HYC) West Khasi Hill District ynne ka sngi da thoh ko cha u Deputy Commissioner ka West Khasi Hill District wow dawa tynyap ya i chem ka Joint Site Inspection wa da pynman da ka Regional Committee, West Khasi Hills Sector ha ka 04-10-2021 ha i thaw wa kajia pood ka Meghalaya wa ka Assam.
Ka seiñ HYC da ban joor ko wa ini i kaam toh u pynbait katkam u pood ka Khasi State/Khasi Hima iwa man katkam ka Paragraph 20 yong ka Sixth Schedule ka riti synchaar ka ri India heiwa emkaam wow ap leh yei pynsñiaw ki Khasi State (Hima wa Elaka ), KHADC wa ki Dorbar Chnong heiyatoh wa u pood.
Neiliang ka seiñ HYC da ong ko wa da khyrngiat ko wow yoo wa ka Regional Committee yong ka West Khasi Hills District hapoh u Renikton Lyngdoh Tongkhar kam u Chairman heipor wa sorjamin wa ka sorkar Assam ya i thaw wa kajia khappood ym em u khut u ya ki Sirdar, Syiem, Rangbah Shnong wot hadooh ki MDC wa ki sahep ka KHADC.
Hajrong ini ka seiñ da beiñ wei da pyrchah ko yeini i leh khynnah u Renikton Lyngdoh Tongkhar deiwa ong wa ki thaw wa kajia ymtoh ki yong ki bru samen heiwa oo (Renikton) ye u wow leh katwa ngait tangwa dang hap hi wow yaklam wa ki bru liang wanang.
Ki dkhot ka seiñ da ong ki wa kam kiwa sakhi ya u Chairman ka Ri-Bhoi District Regional Committee heipor wa lai sorjamin ya ka Ri-Bhoi District da yah leh ya ki Syiem, Syiem Raij, Rangbah Shnong wa kiwa mihkhmat ka KHADC, tangwa neiyi i daw wym leh kamjooh ha West Khasi Hills? Heiwa da suba ka seiñ wa em iyi iyi cha kylla ini waroh wow myntoi ka Assam.
Hajrong ini waroh da pyrchah ka seiñ yei sorjamin wa da pynman ha ka 04-10-2021 ha West Khasi Hill Sector neibhah wa i sorjanmin ym em u man i iwa khooid.
