Dawa u MLA ka Mawsynram wow tipmit ya u saroo, sla tyrpad wa murit kam ki mar rep

Shillong: U MLA ka Mawsynram, u Himalaya M Shangpliang da dawa u wa ka sorkar jylla lyngba ka tnat ka rep ka riang wow tipmit noh ya u saroo, sla tyrpad wa u murit khloo kam ki mar rep wa kongsan ha ka jylla.

Hawa wanrah ya kani ka phang ynne ka sngi ha yung dorbar, u Himalaya da ong u wa kini ki mar rep toh kiwa da psa wow pynim ya ki warep ha ki bynta wa boon ka jylla tangwa hadooh katni ka sorkar dang kheiñ mar khloo ko ya ki, da booh ya ki warep ha i eh heiwa da chah ksih ki katwa ngait ha ki mahajon manda poi ki mar ha yaaw.

Da ong u wa kamwa T.2.5 klur kamai ki warep ka thaiñ Mawsynram ha ka chi snem na i rep saroo wei pynmih saroo won man ko kamwa 1 lak ton chi snem, wei kamwa T.2.5 klur da mih na ki warep sla tyrpad naka thaiñ Mawsynram ha ka chi snem wei ye ki wow pynmih 1.5 lak ton chi snem.

Heijooh i por, da ong u wa u murit khloo toh uwa syad dor bha tangwa katni ka dor yong u murit toh du T. 530 chi kilo ha Mawsynram wei T. 550 ha Shillong, wei ka thaiñ Mawsynram pynmih murit ko kamwa 50 ton chi samoi, wei da yoh lap ko hadooh T. 2.65 klur.

Related posts

U pyndam ka Mizoram ya kiwa kreh sorkar ki wym ye wow leh yei kaam yong ki

November 28, 2024

Sdang ka sorkar da ka Community Public Private Partnership deiwa e yarap Rs. 106 klur

November 28, 2024

Da ong u wa ka sorkar da e daw ko wa i rep saroo ktah ko ya ki khyndaw neidaw wa riñ ware ko ya ka um wei pynraw ko ya i khyndaw, tangwa ya u siej uwa dai na ka jooh ka yung pynchlur ko wow rep wei wow tipmit ya ki kam ki mar rep. Da pynrap u deiwa ong wa ka sorkar toh u pynbait ko ya i bha neibynnta ki paidbah khamtam hawa yoo ko ya ka myntoi na ki kaam yong ki.

Chooh chooh da ong u wa nalor wa da chah khang ka kaam tih mooyong, ki moochuni wei tih moo, ki paidbah hawa yoh ki wow kreh kam kani ka jait kaam toh wow pynchlur khamtam wa wai laad ko ya kiwa boon ki kaam khamtam hawa dooh wei duna poisa.

Katwa u MLA ka Mawphlang u Syntar Klar Sunn da ong u wa u murit khloo toh uwi na ki mar rep uwa kordor bha wei man u leh uwa em ha pyrdi i ma wow dooh jait noh lada ym sumaar wei ym pynchlur wow rep ya ki.

Da ong u wa heipor nachwa waroh toh ki mar khloo, tangwa da pynkylla ya ki cha ki mar rep neibynta wow myntoi ki bru, da kylli u kammon u eh ka sorkar wow tipmit noh ya ki kam ki mar rep hawa ki paidbah yoh myntoi ki na ki.

Katwa u MLA ka Nongpoh, u Mayralbon Syiem da ong u wa ka sorkar toh u booh dor ko ya u saroo wow lait na i chah ksih dor ha ki mahajon katwa u MLA ka Umroi, u George B Lyngdoh da ong u wa ka sorkar toh u pynkrehkaam noh ko ki laad ki luti kiwa biang wow yarap ya ki warep neibhah wa kamwa da ong katni kiwa Register pyrtuid cha ka Agricultural Board em ki du 255 ngut ha ka jylla.

U Montri ka tnat rep ka jylla u Banteidor Lyngdoh hawa jubab ya kani ka phang da pyntip u hapoh ka yung dorbar wa i dor yong u saroo katni toh hapyrdi T. 1500 hadooh T. 4500 wei ka sla tyrpad won T. 1600-T.2500 chi Quintal wei u murit won i dor toh hapyrdi T. 550-T. 600 chi kilo.

U montri da kular u wow bichaar ya i dawa wow tipmit noh ya ki kam ki mar rep hadien wa da chong pyrkhat wa ki sahep ka tnat.

Chwa ini neiliang kiwa chimbynta da pynsñiaw ki yei wym hun ya ka jubab u montri deiwa ong wa oo emkaam wow man u uwa da pynkhreh wow jubab deiwa hun, wei hadien ini neiliang u Banteidor da kular u wow bichaar bniah ya kani ka kaam.