U MLA ka Jowai, u Wailadmiki Shylla hawa yieñ klam hapoh ka dorbar chna aiñ ynne, da ong u wa i duna bru wakreh hapoh ka Jowai Civil Hospital, Ialong wa haka MCH Jowai da ktah ko yei rukom krehkaam kini ki ar tylli ki thaw sumaar.
Da khana u wa du ar tylli na ki san tylli ki ICU toh kiwa krehkaam neidaw wa duna bru wakreh wei ka sorkar toh u chimkhia ko wow thung bru yow lait u sepai ki tiar ki tar.
Da kdaw u leh ya ki kynta wa krehkaam ki Testing Lab wa em hapoh ka Hospital kiwa krehkaam du heipor wa wai ka OPD iwa da ktah ya kiwa wan phah sumaar. Kamtæ da kyntu u yaka chnat wow chimkhia ko wow ye ki Testing Lab u krehkaam 24 kynta.
Da dawa u leh wow pynboon ya ki Drug Rehabilitation Centre ha Jaiñtia Hills wa em du kawi donhi hadooh katni.
Heiyatoh wa ki kaam yalehke, da kyntu u wow pynku ya ki thaw yalehke wa em ha Ri-loom Jaiñtia heiwa ka West Jaiñtia Hills da pynyoo ko yei sap ha kani ka Meghlaya Games wa dang dep pynman wei da jop ko leh yaka Inter-School ynnin u snem, wei da emkaam wow pynboon ya ki Coach kamjooh kiwi ki laad yarap.
Chooh chooh da dawa u leh wow wanrah yaka Superintending Engineer Office ka chnat PHE ha Jowai yow yarap yeiwa emkaam ki paidbah neibhah katni da hap wow lai Shillong yeiwa emkaam.
Da ong u leh wa emkaam wow pynchna ya ki sarok chnong wei wow chna chooh chooh ki sarok wa pynyabi wa u Jowai Bypass yow lait u khynnia ka chnong Jowai.
Neibynta ka chnong Jowai da ong u wa emkaam wow wanrah Scheme saam umkor kam ka Syntu Ksiar Water Supply Scheme.
Heiyatoh waka puræ puthi da ong u wa emkaam wow pynheh yaka Kiang nangbah Govt. College neibhah wa toh du kani donhi ka College sorkar wa em ha Jaiñtia Hills wei kamwa man kattæ da chem chitom ki khynnah boon jait heiyatoh waka puræ puthi neidaw wa da khynnia ware kani ka College neibhah heithaw wow em du 25-30 ngut ki khynnah ha kawi ka kamra da hap wow thap hadooh 80 ngut.
Kamwa da yoh Tech Park ka Tura hei lut wa Rs. 127 klur, da dawa u leh wow booh ya kani ka jooh ha Jaiñtia Hills.
Ha iwi won i liang da ong u wa ka West Jaiñtia Hills toh kawa boon dooh kiwa yoh yaka Scheme PMEGP, kamtæ da kyntu u wow pynboon ya ki e sikai seiñ khih lyngba ka Skill Meghalaya, PRIME wa kiwi de kam kini hapoh West Jaiñtia Hills deiwa pynman leh yaka PRIME Mega Entreprenuer Expo ha Jowai kamwa da pynman ha Shillong.
Khaddooh da ong u wa emkaam u pyndep u chna pyndep noh yaka Iawmusiang Shopping Complex kawa katni toh kawa da lait na waroh i thut wei hadooh ka Revised Estimate leh da dep pynkhreh, wei yow chna ya kani hadooh 626 tylli ki dukan chongdai da hap tympra iwa mut 626 tylli ki manyung kiwa da chaniah na kani ka yaaw wei da ngait skem u wa u Montri Rangbah u chimkhia u ya ini waroh.
Discussion about this post