Ka seiñ Barak Valley Khasi-Jaiñtia Welfare Organisation (BVKJWO) da thoh ki cha u Deputy Inspector General of Police Southern Range, Silchar, Cachar, Assam yow kyrpaad na oo wow e yei yada yaki jaitbru Khasi-Jaiñtia kiwa sah ha Barak Valley (Southern Assam).
Ka seiñ haka chithi da ong ko wa dap ki dei sñiawkhia yei jia wa sñiawsih ha Ichamati, Meghalaya haka 28 tarik u Thohlakhmi heiwa da dooh yei mynsien yong uwi u dkhot ka KSU iwa da wanrah yei su kylliang yeiwa jia iwa da poi chei yap wa i mynsoo ki baar jylla.
Ka seiñ da ong ko wa da beiñ joor ko ya ini mynsoo mynsnam waroh wei toh u pynchitom ya kiwa emkti, heijooh i por leh da beiñ yaka HNLC kawa da maham ya ki baar jylla wa sah ha Ichamati wa Majai wow yut chnong ki hapoh chi bnai napoh ka jylla Meghalaya iwa da wanrah yei sñiaw yaphær jaitbru cha palat u pood ka Meghalaya. Da pyntip leh wa ki jaitbru Khasi-Jaiñtia toh kiwa im wa sah ha palat 280 tylli chnong wa em hapoh Barak Valley wei da im ki dei suk dei saiñ, deiwa ya sñiawthooh yumut wa ki Bengali kani ka thaaiñ wei da beiñ yei wanrah ka HNLC yei wym chaniah de hapyrdi kini ki ar jaitbru.
Da kdaw leh yei mih khubor haka Barak Valley Chronicle haka 04-03-20 heiwa kiwa yahkhmat ki seiñ kam ka Amora Bangalee, All Assam Bengali Hindu Association wa kiwa seiñ yaka ACKHSA, wa i klam yong ki ye ko poi chei sñiawphær jaitbru iwa daw ktah yaka imlang sahlang ha kam kini ki por heiwa ki khynnah puræ kam ha Silchar, Karimganj, Hailakandi wa emlang leh ki khynnah Khasi-Jaiñtia ye ki wow em hei maa wei emkaam ya ki pulit wow chimkhia ki ya ini.
Da pynkut deiwa ong wa ka seiñ kreh ko yow wanrah yei suk i saiñ wei da kyrpaad yaka yung krehkaam u DIGP wow phah ya waroh ki khlieh District, ki Police Station, Police Outpost wow man ki kiwa paitbniah ya kani ka kaam yow lait na kiwon kiwon kiwa pynthut yaka suk ka saiñ u chim kabu.
Ya kani ka jooh ka chithi da phah cha u Chief Minister ka Assam wa u Chief Minister ka Meghalaya, cha u Home Minister ka Meghalaya wa kiwi kiwi.
Discussion about this post