Ka lehkmen Christmas ka chnong Moolamylliang deiwa pynriam khrik-khrak kawa tip kam ka Christmas Lights Extravaganza kamjooh leh yow pdiang ya u snem thymme da poi noh ko cha wakut ynnin i miet ka 3 tarik dei budnood ki paidbah.
Ka chnong da pyntip ko wa ha uni u snem dang ku chooh chooh i boon bru kiwa da wan na kylleiñ ka jylla Meghalaya wa na baar ka jylla leh.
U waheh chnong, u Apmon Pachiang da ong u wa ha ki snem wa da lai noh, ka chnong Moolamylliang toh kawa da tymmoh da ki tngit ki jakhlia kiwa da yoo paarsnieh, tangwa deiwa kreh chitom kiwa chong chnong, da ye wow pynkylla dur yaka cha kawa khooid wa tyrchaaiñ.
“Ini wa ye i, ye i wow e mynsien ya kiwi ki chnong wow booh ya ka thong wow yoh yei khooid i suba,” da ong u Apmon.
Da e khublei u ya ki paidbah nadooh kiwa mihkhmat ka sorkar jylla, ki sahep, ki paidbah, kiwa tem wa rwai kiwa da wanpoi yow pynman ya kani ka lehkmen ka chnong iwa jop.
Da pyntip leh wa ha uni u snem daw pynman biang ya ini i jooh nadooh ka 16-12-2023.
