Ka lehñiam Behdieñkhlam ka Seiñ Raij Mukhla 2024 ynnin da poi ko cha ka sngi wa le (sngi Musiang), heiwa ki khon khynroo chirup wa ki waheh da mih ki heipor 11:30 i step wow yachem paidbah ha madan Ei Iadaw Rong deiwa emlang ki khon khynroo na ka chnong Mukhla Nongrim, Mukhla Shohshrieh, Mukhla Umlangshor wa na Ladmukhla wei chwa ini da yachem ki wow lai Chaad Sngi, wei kamjooh yow lai rah ya u Dieñkhlam na Mukhla Umlangshor yow yoh u pynyieñ ya uni u Dieñkhlam Blai ha madan Ryngkaw, wei hadien wa da wan Chaad Sngi da yoh u pynyieñ ya ki 3 tylli ki Dieñkhlam Blai.
Heipor 2:00 waje da pynyieñ ya uwi u Dieñkhlam Blai ha Tihkyndaw katwa ki ar tylli won ha madan Ryngkaw uwi u yong ka chnong Mukhla Nongrim katwa uwi won u yong ka chnong Mukhla Umlangshor.
Ha kani ka Chaad Sngi, ki khon ka Seiñ Raij Mukhla da li chaad ki cha ka chnong Mukhla Shohshrieh, cha Mukhla Umlangshor, cha chnong Ladmukhla dep tæ pynkut ki ya ka Chaad Sngi ha Mukhla Nongrim ha madan Ryngkaw.
Kamtæ hadien wa dadep u pynyieñ ya ki 3 tylli ki Dieñkhlam, neiliang u Pa Langdoh uwa man u Khliehdooh hapoh ka niam ka rukom ka raij uwa ksoh ya ka Plang ka Nar, u Tylli u Kyntien, ka Wait ka Stieh, da pynman u ya ka Dorbar Niam chirup wa ki Waheh Sankur kiwa man kiwa bood yong oo hapoh ka niam ka rukom wei ya kani ka Dorbar Niam da pynlai da u Pa Langdoh chirup wa ki Waheh Sankur wei da yaklam da ya pyrkhat kaam ki ya ki kaam kiwa toh u leh næ u pyndep neibynta ka ka sngi Muchai kawa man leh ka sngi pynkut ya ka lehñiam Behdieñkhlam ka Seiñ Raij Mukhla.
Ha kani ka dorbar da ya pynbait ki neibynta ki bru ki wow ya chimbynta wow pynbiang ya ki tiar kñia, wei kamjooh da kyntu ya ki khon khynroo wow sñiawbha ki u rap tyrnit ki u pynpoi ya ki Dieñ Waliar, ki bom ki bhuri wow yoh u lai li choh thyndai yung ha ryngkat ka sur tem sur put da ka bom ka bhuri, ki bikur wa kiwi kiwi .
U Pa Langdoh won da e u i snieñ i kroo ya waroh ki khon ka Seiñ Raij neibynta ka Chaad Sngi ha ka sngi Muchai yow man ki khon ka Seiñ Raij kiwa emakor emburom.
Ha kani ka sngi yong ka lehñiam Behdieñkhlam ka Seiñ Raij Mukhla da wan u chimbynta leh da u Wailadmiki Shylla uwa man kam u MLA ka Jowai, wei heijooh i por leh wa man u u khon yong ka Seiñ Raij Mukhla uwa da e leh ki kyntien snieñ kyntien kroo ya waroh ki khon khynroo khyllood ka Seiñ Raij Mukhla.
Kamtæ hadien wa da wai kani ka dorbar niam, u Pa Langdoh chirup wa ki Waheh Sankur kamjooh wa ki Sai Khrong Sai Kyncha da ya tyngkheiñ ki ya ka nga ka ngooh ka dem Blai hakhmat ka Khloo Blai Khloo Kyntang yow kyrpaad ya u Blai Kynrad yow theh chooh chooh u ya i kyrkhu kyrdoh ya waroh ki khon ka Seiñ Raij Mukhla.
Discussion about this post