Ka Jowai Diocese Catholic Youth Movement (JDCYM) da pynman ko ya ka Annual Youth Fest 2025 ha Holy Family Khliehriat Parish, East Jaiñtia Hills District haka 30 wa 31 tarik u Naisaphra wei da man ko kawa chitrhem deiwa wan chimbynta ki khon khynroo khyllood na ki Parish wa Unit waphær waphær wa haap hapoh ka Jowai Diocese nadooh ka 30 tarik.
Ha ka sngi sdang da pynman da ka Mass Wa Khooid ka ngooh ka dem Blai da u Phadar Lawrence Paswet, Diocesan Youth Director ryngkat i synraanlang kiwi ki phadar wei da wan wai pyrda da u Pius Marwein, MLA ka Ranikor kam u kongsan katwa u Kyrmen Shylla, MLA ka thaiñ da wan u kam u symbood kongsan deilang kiwi kiwa chah khut sñiawbha.
Ha ka sngi wa bood won ka Sngi U Blai da pynkut ya ka Youth Fest da ka Mass Wa Khooid wei Mane Sacrament wa da yahkhmat da u Bishop Ferdinand Dkhar heiwa da kyntu ya ki khon khynroo khyllood wa ha uni u snem yong ka Jubilee wow man wow em i kyrmen ha ki, u man kiwa chlur, kiwa maya wei burom kylliang, u man leh kiwa tipbru tipblai, kiwa chitrhem hei ngait wei iwa kongsan dooh toh yow nang pynkhlan chooh chooh i yatoh wa u Blai.
Heijooh i por da pynkupbor leh ya kiwa kitkaam wa thymme yong ka JDCYM neibynta ka samoi 2025-2028, wei da pynbood won da i lehburom ya kiwa kitkaam warim.
Heipor noh chariñ sngi da yoh i klam pynsñiawthooh wei pharia ya ka ktien u Blai hajrong ka phang: “Ha kane ka snem jubili uwei pa uwei na phi u dei ban wan phai sha la ka jaka puta (Lebitikus 25:13)” da u Phadar John Michael Marboh, Parish Priest Barato, pynbood da i saam khusnaam cha kiwa jop ha ki Dancing wa Mono Act Competition.
Da pynkut ya kani ka Youth Fest deiwa pynhiar ya ka lama ka seiñ da u Justine Dkhar, MLA warim heithaw yong ka Santa M Shylla, MLA ryngkat wa i sneiñ i kroo wei da pynbood dei klam e khublei na ka General Secretary ka JDCYM, ka Esbunmitre Nongrum wa na ka Nancy Shylla, General Secretary ka Khliehriat Parish.
Ha kini ki ar sngi da pynphooh pynphieñ ya kani ka yachemlang ki khynroo khyllood deiwa pynchongchit da ka chaad ka kmen, ka put ka tem wa i rwai i siaw.
Discussion about this post