Hadien wa da kut i e por yaka sorkar Meghalaya, heiyatoh wa i kyrpaad wa da dep e cha u Prime Minister ka ri, u Narendra Modi lyngba u Governor ka Meghalaya wa cha u Chief Minister, kamtæ ka All Jaiñtia Mid Day Meal Workers Union (CEC) Jowai, haka yalang wa da man haka 21 tarik uni u bnai da rai ki wow pynman daka “Peaceful Hunger Strike” namo ka chong chah thngan haka 31 tarik uni u bnai nadooh i por 09:00 waje i step hadooh 05:00 waje i janmiet ha Shillong.
Ya kani ka chah thngan da rai u pynman neidaw wa ka sorkar Meghalaya ym ap ym pynkrehkaam ko ya i kyrpaad wada e ka seiñ nadooh u Naiynru 2019 deiwa pteiñ leh u pynkynmoo la kamwa san sien hadooh ka 20 tarik uni u bnai.
I dawa wa dang sahteiñ kynthup ki yow su pyndep yaka Honorarium lyngba ki Bank Account yong ki Mid Day Meal Cook wa ki Helper wei u su leh man-u-bnai kat hadooh u Naitung (Apr) 2022, najrong i kyrpaad u pynku yaka Honorarium naka T. 900 cha ka T. 4000 chi bnai, iwa jooh yoh T. 100 naka sorkar Meghalaya u ku cha ka T. 1000 chi bnai iwa waroh toh u yoh noh T. 5000 chi bnai.
Neitæ i rukom su leh ymtoh dei su ki du chiphaw bnai haka chi snem tangwa waroh khad-ar bnai, wei u chet ja da ka LPG ymtoh da ka dieñ u rngaw najrong u pynbiang umkor haki thaw chet ja sngi haki skur wa kiwi kiwi de i kyrpaad neibynta i bha i miat ki Cooks cum Helper wa ki khon ki yong ki.
Kamtæ hajrong kani ka rai ka seiñ da kyrpaad ko ya waroh kiwa kreh kam ki Mid Day Meal næ PM POSHAN Cooks cum Helpers ka jylla Meghalaya wow ya chibynta ki deiwa chongchit ha kani ka chah thngan ha ka 31-05-2022 ha Shillong.
