Shillong: Ka Election chiteiñ samoi neibynta ka Ampati Constituency kawa haap hapoh ka South West Garo Hills da chit bha ko hadien wa ki 5 ngut ki MLA na ri-loom Khasi da hiar ki wow yalap neibynta ka kyrtong ka party Congress ka Miani D Shira (INC), kawa man leh ka khon u Dr. Mukul Sangma.
Kini ki san ngut ki MLA Khasi kynthup ki ya u HM Shangpliang u MLA na Mawsynram, u Charles Pyngrope u MLA na Nongthymmai, u PT Sawkmie MLA na Mawlai, u David Nongrum MLA ka Sohryngkham wa u Kimfa Marbaniang MLA ka Rambrai.
Napyrdi kini ki san ngut ki MLA Khasi, ki paidbah kani ka Constituency da chah chkoor bha ki ya u HM Shangpliang, MLA ka Mawsynram Constituency neibhah wa da klam u dei ktien Garo.
Ha ki chnong wa boon ki jaitbru Hajong, u Shangpliang da klam u dei kien Hajong hi, katwa ha ki chnong wa em boon ki Bengali da klam u dei Bengali wei ini da pynsñiaw yajan ko ya ki paidbah.
Hawa klam ha man ki yalang ha Ampati Constituency u HM Shangpliang da pyntip u wa oo toh uwa mih khmat ya ka Mawsynram Constituency kawa ki jaitbru Garo da em ki da ki hajar ngut.
Da ong u wa ki kaam pynroi yong u Dr. Mukul Sangma uwa man leh u Montri Rangbah warim ka jylla kiwa da wanrah u ha kani ka Constituency toh u pteiñ ya ki lyngba ka khon yong oo (Mukul) ha kani ka kynti. Da ong u leh wa lada u Dr. Mukul Sangma katni da em u ha Songsak Constituency iwa mut wa kattu ha Ampati Constituency da man MLA u la san sien.
Napyrdi ki san ngut ki MLA Khasi, ya u HM Shangpliang wa ya u PT Sawkmie da phah lang wow yalap cha ka chnong Malchapara wa Gitchikchakre hei emlang u MLA ka Chokpot, u Lasarius Sangma wa u Jimmy Sangma, MLA ka Trikikilla Constituency.
Da yoh yutip wa nalor kini ki san ngut ki MLA da em leh sa kiwi ki MLA na ri-loom Khasi Hills kiwa lai yalap election ha Ampati nadooh ka 22 tarik uni u bnai wow wanrah yei jop ya ka khon u Dr. Mukul Sangma.
Discussion about this post