Kam chibynta wow lehkmen leh sñiawbha yow pynem warom ya ka Kopati Puja ka wow man ha ka 25, 26 wa ka 27 tarik uni u bnai, ka Seiñ Raij Raliang da pynman ko dei kreh yonglang ynne ka sngi heiwa ki khon Niamtre dei mynsien ka’it da mih ryntih lang ki nadooh ki manbei, manpa, ki khynroo khyllood hei wow pynkhooid pynjngiar, ya ki luti syngkieñ nadooh na laad Club luti Baam Yangkhat, Loom Thangbru, Loom Chaad Ksohtympong wa Loom Mowtylleiñ.
Chooh chooh kam wow pynphooh pynphieñ ya katai ka sngi da chimbynta chongchit ki khon Niamtre wow puchara chuni nadooh Yung Seiñ Raij chadooh i yung u Wamon (Sohblai) kam ka dak ka wow pdiang ya ka Kopati ha uni u snem.
Kamtæ ka Seiñ Raij Raliang lyngba u General Secretary yong ka, u Wh. Hamjhan H Dkhar chim ko kani ka laad wow e khublei Kopati Puja wa suk wa kmen ya phi waroh ki khon Niamtre yong ka Raij Raliang kamjooh lang ya waroh ki paralok parajor.
“E wa kani ka Kopati Puja u thæh ko i kyrkhu kyrdoh i chait i tram u mankhih mankhan khnang wow dap u thiar u tyllu, u kyllep sdep ka yung ka sem liang wa nang khamtam nadooh ka 26 tarik ka sngi Pamblang ka sngi wow Pastieh wow chaad u kmen u yoh ki khon khynroo khyllood u chkæh ki kjat ki kti i tyrpeiñ tympha, kamjooh leh u ye ki u lehbha ha ki Exam waphær waphær wow yoh ki u Pass bha na kawi ka Class cha kawi khnang u man ki sahep saba hapoh ka Raij ka muluk ka ri yong i,” da ong ka Seiñ Raij Raliang.
Discussion about this post