Ka Khasi Students’ Union (KSU) hei yahkhmat yong u President, u Lambokstarwell Marngar da yachem ki waka Dr. Ampareen Lyngdoh, Montri ka chnat i chait i khiah hajrong i thung kreh ha NEIGRIHMS heiwa da mih boon tylli ki kynrum kynram.
Katkam wa tip wei chem ka seiñ wa neibynta i kreh Record Clerk, kamwa 15 tylli ki yukylli wa da e toh hei ktien Hindi wei ini da pyndooh nong ko ya ki khynroo khyllood kiwa da pynkhreh yow thoh yaka Exam neibynta ini i kreh neibhah ka Exam da toh u man ko hei ktien English. Chooh chooh ka seiñ da yoh khubor ko leh wa ki bor pynlai ka NEIGHRIMS da kwah ki wow pynmih smat yaka Result yong ka Exam hanla ym pu pynsakhiat ya ki kot ki sla yong kiwa yaleh Exam wei ini da pynartatien ko yei leh ki bor pynlai ka NEIGRIHMS boi ym iyi ræ iyi cha kylla.
Ka seiñ haka dorkhat yong ka, da pynsñiaw ko leh yei lynngoh hajrong ka Exam yong ki Nursing Officer wa da pynman lyngba ka NORCET -5 Examination wa dadep ha kini ki kajiak bnai, heiwa da em 194 tylli ki kreh wa lait neibynta ki Nurse wei na kini, 175 tylli ki kreh da lai cha ki chynrang kiwa wan na kiwi won ki jylla wei du 19 ngut ki kynthai wei na kini won 15 ngut toh ki jaitbru ri-loom ka jylla Meghalaya.
Ka seiñ da ong ko wa kamwa jooh man ha kiwi ki Medical Institute ka bhah yong ki kynthai wa chynrang toh 80:20 tangwa ha NEIGRIHMS won da man mar dei khangtleiñ wei kini kiwa yoh kreh toh ki wym pu em jooh dep kreh chwa namo kiwa em yaka Practical Experience kiwa pyndep du yaka Theory Exam na ki thaw puræ yong ki iwa daw ktah ya kiwa wan phah sumaar.
Ka seiñ da pynkynmoo ko leh yei yaleh kreh Grade B wa Grade C wa da pynman da ka ka HLL Agency heiwa kiwa boon kiwa thoh Exam da booh thaw ya ki ha Guwahati, Jorhat, Dibrugarh wa Delhi yow thoh Exam hadooh wa kiwa boon ym yoh ki wow lai thoh Exam.
Kamtæ ka seiñ da kylli ko wa ileh da hap wow e phah pynman Exam da ka HLL wa NORCET heiwa da yoh kreh du kiwa na baar jylla donhi.
Ka seiñ da kyntu ko ya ka sorkar jylla wow pait wei bichaar bha hajrong ini i bynta wei wow kyntu wa neini chakhmat wa ka NEIGHRIMS toh u pynman hi ko yaka Exam ymtoh wow e pateiñ cha kiwi won.
Neiliang ka Montri da kular ko wow chimkhia yeini waroh.
Discussion about this post