Ka All India Congress Committee (AICC) da pynbna ko wow pynman da ka lai paidbah wa 150 sngi namo ka ‘Bharat Jodo Yatra’ kawa daw yahkhmat da uwa yahkhmat ka Party, u Rahul Gandhi nadooh ka 7 tarik uni u bnai.
Ka National Spokesperson yong ka All India Congress Committee (AICC), ka Babeeta Sharma da ong ko wa ini i lai paidbah toh yow pynsñiawthooh cha ki paidbah yei chah ktah ha ki 8 snem nadooh wa da synchaar ka sorkar BJP, neibhah ha kini ki snem da pynjæd pynpra yei kyrmen yong ki paidbah, khamtam hei ku dor ki mar ki mata, i wym yoh kaam yoh jaam kamwa da kular da ka BJP.
Kawi won ka phang wa ka Congress da chim ko ha kani ka ‘Yatra’ toh hajrong i wym chngaaiñ wa i wym man de iwi hapyrdi ki para wa chong chnong, neibhah da wanrah yei yaphær du na ki daw wa malu mala yow lait u yaklam ya kiwi won ki phang wa kongsan kam yei ku dor wa da maad.
Neiliang ka Babeeta da khana ko wa ya ka ‘Bharat Jodo Yatra’ daw sdang ha ka 7 tarik na Kanyakumari, Tamil Nadu da u Rahul Gandhi wei daw pynkut won ha Jammu & Kashmir, heiwa da khana leh wa ha ka thaaiñ North East ya ini daw pynbait da ki Pradesh Congress Committee kammon wow ya embynta ha jar jiar ki thaw.
