Ynne ka sngi ka yung krehkaam yong ka District Tuberculosis Officer, West Jaiñtia Hills lyngba ka National Tuberculosis Elimination Programme, da pynsñiawthooh paidbah ko hajrong ka kjut TB deiwa pynman yei lai uiñ da ki thuk-thuk namo ka Bike Rally deilang waka tanghæng wada sdang na madan Mihmyntdu ter ter u sarok wei da lai lyngba ka Iawmusiang deiwa pynkut won ha District Tuberculosis Centre ha Panaliar, Jowai.
Lyngba ka sur rwai naka tanghæng da kyntu yaki paidbah u wan mih ki cha ki thaw e sumaar lada em ki dak ki chin kam i kyoh wa neh ar tayaw lane palat, i iñdoh, i mih chit miet, i tlot, i wym bang baam, i add haki Gland wei ky’oh snam.
Haka yalang tbian wada pyman ha District Tuberculosis Centre ha Panaliar, Jowai, ka Dr. EBV Laloo In-charge District Tuberculosis Officer da kyntu ko wymtoh u kheiñ stiñ ya kani ka kjut neibhah man ka 3 minit da em arngut wa dooh ya i mynsien na ka.
Hajrong ka thong u pyndooh jait ya kani ka kjut TB, da kyntu haroh ko wow phah Test cha ki thaw e sumaar wada pynbiang ka sorkar khlem i su. Wei katni ha TB Centre ha Jowai leh da em ka CB-NAAT Test waka Microscopic Examination.
Najrong wym emkaam su, ka sorkar lyngba ka Nikshay Poshan Yojana yarap bai baam haroh ko T. 500 chi bnai ya kiwa kjut TB hadooh wa pyndep yei sumaar.
Da khana ko wa kiwa kjut TB kiwa da wan cha ki thaw sumaar ha u snem 2021 ha waroh ar ki District ka East waka West Jaiñtia da poi ki palat 675 ngut wei napyrdi kini kiwa dih dawai em ki kamwa 90%.
Najrong i klam ka Dr. EBV Laloo In-Charge District Tuberculosis Officer da pynkup burom haroh ya ki wakreh kani ka chnat kamjooh ki ASHA.
