Shillong: Ki dkhot ka Meghalaya SSA School Association (MSSASA) Central Body ynne ka sngi da lai yachem ki wa u montri rangbah ka jylla, u Conrad K Sangma ha kamra krehkaam yong oo kam ka dak wow pynyoo yei sñiawngooh kam uwa yahkhmat ka jylla uwa da krehchitom neibynta kiwa sikai Sarva Shiksha Abhiyan (SSA) hapoh ka jylla.
U President ka Meghalaya SSA Schools Association Central Body, u Aristotle C Rymbai da ong u wa i sdang u bnai man ko kawa kmen ya ki 12,481 ngut kiwa sikai SSA heiwa da yoh T. 13526.50 lak wow su ya ka tulop wa sah kawa khadooh khadwai da pyllait ka tnat sorkar pyrdi ka MHRD cha ka jylla ha kini ki sngi wa dadep.
U Conrad da pyntip u wa ka poisa da pyllait neibynta ka tulop wa 5 bnai wa sah nadooh u Khonchonglad (Nov) 2017 hadooh u Wisu (March) 2018 cha ka Treasury Branch wa cha ki Bank Account ka SSA-SEMAM yow pynpoi ya ka tulop cha jar jiar ki DMC hapoh kani ka tayaw.
U Rymbai da ong u wa ha kini ki 5 bnai da chah ktah bha kiwa sikai neidaw wa dooh tulop tangwa nadooh wa wan ka sorkar thymme ka Meghalaya Democratic Alliance (MDA) hapoh i yahkhmat u Conrad wa i chimkhia u montri ka tnat puræ puthi u Lahkmen Rymbui da chimkhia ki wow kreh neibynta ka bha ka miat kiwa sikai SSA.
Chooh chooh da ong u wa du hapoh 24 sngi wa wan ka sorkar thymme da ye ki u pyllait ya ka tulop wei da yooluti u leh wa daw ye ki leh u pyllait saka Arrear wa 8 bnai yong u snem wa mang poisa 2016-17 wei da kular ka sorkar wow leh yeini.
Discussion about this post