Jowai: Ynne ka sngi hapyrdi wa ktah ka khlam COVID-19 ya ka ri wa ka pyrthai, ki khon ka Raij Tuber dei mynsien wa khia wei yatylli da mih ki wow pyndep ya ka Behdieñkhlam hapyrdi wa bood ya ki kyndon wa da booh da ka sorkar.
Ka lehniam ynne ka sngi da sdang ko hei step da i choh thyndai ha man la ki manyung ki khon ka Niamtre wa em hapoh u pood u ang ka Raij.
Ha Biar Aitnar, Tuber Kmaichnong da wanrah ya ki ar tylli ki Rot ki Rong wa da wanrah na Tuber Wah Chnong wa Neiñchnong kiwa da chna hajrong ki kaam wa yatoh wow yada na ka khlam u COVID-19 kamjooh leh da wanrah ya i rong (khlam) heidur ka khlam hei khlieh (i dur u khñiang COVID-19).
Ki Wasan wa kiwa chah jied na ki chnong da rah ki ya ki Pyrsiej kiwa da pynman salan hei thaw ki Rot ki Rong.
Hadien wa da pyndep ya i engooh edem da kiwa chimbynta, da pyndep ya ka Taan Bhang heiwa da jop da ka phang neiñ wei hadien ini da noh ya ki pyrsiej wa ki rot ki rong wa da wanrah ha kani ka sngi kam ka dak wow noh ya iwa sih wa roi wei wow beh ya ka khlam ka dait.
Ya kani ka sngi pyndep ya kani ka lehniam Behdieñkhlam da wan sakhi da u Montri ka sorkar jylla uwa man leh u MLA ka thaaiñ, u Kyrmen Shylla, u MDC ka thaaiñ u Lasky Rymbai, u Dolloi u Puramon Kynjing, wa kiwi kiwi.
Chooh chooh ha uni u snem ym em ki paidbah wa wan sakhi ya kani ka Behdieñkhlam lait noh du ki kattu katni ki bru na ki yung wa em hajan harood ka Aitnar.
Hawa yaklam wa u President ka Seiñraij Tuber, u Bewill Shylla da ong u wa ka Behdieñkhlam ka Raij Tuber ha uni u snem da man ko kawa miat kawa bha heiwa ki kñia wa kiwi ki lehniam leh man ki kiwa lai bait.
Da pynrap u leh deiwa ong wa kani ka Behdieñkhlam man ko ym du kat wow beh ya ka khlam (COVID-19 wa kiwi ki kjut) tangwa wow beh leh ya iwon iwon iwa sih wa roi na ka Raij ka Muluk, ka Elaka ka jylla ka ri wa ka pyrthai waroh kawi.
