Jowai: Ka Dorbar Chnong Dulong hapoh ka Raij Jowai dei sñiawkhia yei suk i saiñ wei i miat i bha ki khon ka chnong ka thaw kamjooh ka ri wa ka jaitbru ha kam kini ki sngi ki por yong i tynjooh neidaw ka kjut COVID- 19, ynne ka sngi Khyllaw 17 tarik Naisan i step hei chimbyntalang ki kattu katni ki waheh wasian da pyndep ko yei Ngoohblai Ngoohsyiem wa kyrpang ha yungwalieh hei yahkhmat u Pa Dolloi, Elaka Jowai u waheh Puramon Kynjing.
Ha kani ka step chwa wow yoh i Ngoohblai Ngoohsyiem na’u Pa Dolloi, u M. Bareh, waheh chnong Dulong da yieñ u wow e ki kyntien yahkhmat wei wow khana pynsñiaw leh ya ka thong wa pynman ya kani ka step, hadien neitæ kam i dak i wyrai ya ki mynsien wa da dooh ha chityllup ka pyrthai ha kini ki sngi neidaw ka kjut COVID-19 da em leh i suki wa chi minit.
Ini i Ngoohblai Ngoohsyiem ha kani ka step daman i iwa yoo chongblai chongbru heiwa ki khon ka Dorbar Chnong Dulong kiwa em haman ki thyndai yung leh mih ki ha pchem ha dhari wow wyrchawlang ya ki kti deilang wei bood ya ki hukum adong sorkar.
U Dolloi Puramon Kynjing da yieñ u wow pynapblai pynapsyiem ha kani ka step deiwa paan wa doon yei kyrkhu khyrdoh iwa sarot na khmat u Trekirot, kam heiliang i chongsuk chongsaiñ ka chnong ka thaw, ka ri wa ka muluk, i chait i khiah i miat i bha yong ki bru wa wan na kiwi ki chnong ki thaw ha kam kini ki por, i miat i bha ha ki Doctor, ki Nurse, ki pulit, ki chipai wa kiwi kiwi ki bru kiwa chim ka bynta wa hakhmat dooh wow yarap wei u yada nei poor yong ka kjut COVID-19.
Discussion about this post