Ki pulit ka sorbah Pune ynne i step da kem ki ya u pa yong u khynnah wa 17 snem i rta uwa tyrrah ya ki ar ngut kiwa em ha ka thuk-thuk hadooh wa yap ki da ka kari sy’at dor Porsche ha i step ka 19 tarik.
Katkam wa riñ ka CCTV ya kani ka kari chwa u jia, da antaad wa kani ka kari da pynhær ya ka kamwa 200 Km/h wei uni u khynnah toh uwa da muaid wei ha katai ka sngi wa jia ini dang wan lehkmen u wa ki lok u neidaw wa dang dep Pass Class-XII u.
Ki pulit da lai kem ki leh ya ki ar ngut ki tre Restaurant/Bar kiwa dai kiad cha uni u khynnah wa dang khian rta, kini toh u Pralhad Bhutada u tre ka Cosie wa u Sandip Sangale, u tre ka Blak Club kiwa da chah kem ynnin i miet.
Hei takit ki pulit ya uni u khynnah da ong u wa u pa u da e u ya kani ka kari Porsche cha oo wot hawa tip u wym pliah u yah kari wei ym em License u wei tip hi u leh wa toh uwa myllien wow dih kiad. Kani ka kari toh kawa da thied da u pa u ya oo neibhah daw dap noh u 18 snem ha ki soo bnai wow wan wei ya kani ka kari ym pu em leh Registration ka.
Da khana u leh wa ha katai ka miet da lai ke u deilang wa 10-12 ngut ki lok u wei da psiah ki ha ar tylli ki thaw heiwa da ya dih kiad wei da ya baam ki leh.
U pa uni u khynnah toh u heh spah na Pune wei da kem ya oo hawa pyrchang u wow yut na ki pulit.
Uni u khynnah du hadien kattu katni kynta wa kem ya oo da yoh jamin u heiwa ka Juvenile Justice Board da pynmih hukum ko wow pynlait noh oo deiwa booh kyndon wow thoh u ya ka Essay kawa 300 kyntien deiwa khana kammon sñiaw u yeini wa jia neitæ wow lai thooh yarap yow ye u dam u dih kiad wei wow lai yarap namo wow Volunteer wa ki Traffic Police ka Pune.
Kini ki kyndon da pynchrai i ya ki paidbah hadien wa tip ki yeini.
U Police Commissioner ka Pune da pyntip u wa pyn haka sngi Bibar wa jia ini da paan bor na ka Juvenile Justice Court (Board) wow e laad u bichaar ya uni u khynnah kam uwa da heh neidaw iwa jia neiwa leh u tangwa da kyntait ka Board yeini wei da lai rah yeini cha ka yung bichaar (Session Court) yow paan bor yei jooh.
Discussion about this post