Ka Village Organization (VO) yong ka chnong Ialong kawa kynthup yaki 29 tylli ki Self Help Group (SHG) kiwa em hapoh kani ka chnong da lehkmen ki ya ka World Environment Day deiwa pynkhooid ya ki luti ki syngkieñ yong ka chnong.
Hawa klam yahkhmat ha ka yalang wow wai ya kani ka pynkhooid chnong, ka Sngi Dkhar kawa man ka President yong kani ka VO da ong ko wa ha ki snem kiwa da dep leh ka VO da jooh lehwarom ko ya kani ka sngi deiwa thung dieñ hapoh ka chnong, tangwa ha kani ka kynti da rai wow pynman da ka pynkhooid chnong. Da ong ko leh wa ka VO katni da lai ko chakhmat wa ki kynthai hapoh yong ki SHG wa ki VO kiwa man kiwa chlur wow pynlai ya ki kaam yong ki seiñ yong ki.
Ka Rita Phawa kawa man ka Secretary yong ka VO haka chnong Ialong hawa klam pdiang sñiawbha yong ka, da ong ko wa ka VO da jooh pynman hi ko ki kaam pynkhooid chnong nachwa leh wei da kyntu ko ya ki kynthai wow ya kreh rap bha ki neibhah kani ka sngi man ko kawa kyrpang.
Hawa klam kam u kongsan ha kani ka sngi, u Dr. H.H. Mohrmen da pynkynmoo u wa i lehburom ya ka Word Environment Day kawa da sdang ha u snem 1972, da dap 50 snem ha uni u snem. Hanla ki 50 snem wa da lai leh tangwa i dawa wow pynneh pynsah ya ka rymaw dang neh hi kamjooh. Da yaroh u leh ya ka VO neibynta ki kaam yong ka wei da pynsñiaw u yei sñiawkmen khamtam hawa yoo u wa ki kynthai hapoh kani ka chnong man ki kiwa chlur wot wow yahkhmat ya ki yalang paidbah. Da ong u wa ini toh itæ wa da ong da ka ktien pharæng ka ‘Empowerment’ næ ka pynkup bor ya ki kynthai. Da kyntu u ya ki SHG wow man kiwa yatylli, kiwa skem yumut wei khamtam kiwa che hei wow kheiñ u diah khnang wa ki seiñ yong ki u lai ki chakhmat wow nangroi.
Hadieng yong ka yalang kani ka lehkmen Word Eenvironment Day, ki kynthai da mih paidbah ki wow pynkhooid ya ka chnong deiwa sdang naka yung dorbar yong ka chnong hi.
Najrong ki dkhot yong ki SHG da em leh ki dkhot yong ki Producer Groups (PG) kiwa da wan wow ya chimbynta ha kani ka pynkhooid chnong.
