Jowai: Kam chibynta i lehkmen yaka National Voluntary Blood Donation Day, neiliang ka Jowai Civil Hospital Blood Bank chirup i krehlang waka Meghalaya AIDS Control Society, Shillong waka State Blood Transfusion Council, da pynkup burom ki yaki kynhun waphær waphær kiwa jooh wan kyrchan ya ka Blood Bank lyngba i wan e snam sñiawbha yong ki neipor cheipor wei kini ki kynhun kynthup ki yaka Jingiaseng Samla Balang Presbyterian Jowai, ka Northeast Adventist College Khliehtyrshi, ka Seventh Day Adventist Church Ladthadlaboh, ka Cleanliness Health & Sanitation Committee Kiang Nangbah Govt. College Jowai waka Dorbar Chnong Chilliangraij Jowai.
Ya kani ka sngi da lehkmen ha Jowai Civil Hospital Blood Bank ynne ka sngi hajrong ka phang “Safe blood saves life”. Ka Dr. P. Shylla Incharge Jowai Blood Bank hawa klam, da pynsñiaw ko ya i sñiawngooh wa khroo ya kini ki kynhun kamjooh ya kiwi tawan nalor ki bru samen kiwa lyngba i man sbun yong ki wow kyrchaan yaka Blood Bank, kitu ki bru wa emkaam snam hei kjut chitom yoh ki yei im.
“Wym em iwon iwon wa ye u pyniaryngkat wa i kordor i snaam wa phi e sñiawbha phi, kamtæ wym ye de O wow pynsñiaw hadooh katwon itæ i kmen wa em ha nga lyngba i man sbun yong phi,” ong ka Dr. Shylla.
Da yoh leh i klam na u Secretary Social Committee ka Jingiaseng Samla Blood Donation Cell u L.T. War uwa da pynsñiaw yei lai luti ka Cell nadooh u 2008, wei i klam na uwa sikai ka Northeast Adventist College Khliehtyrshi u Job Kawlni uwa da yoh leh yaka Special Award ha kani ka sngi neibhah wa de u palat 10 sien i e snam ha kani ka Blood Bank.
Ha kani ka sngi hadien ka yalang wa tbian da em leh i e snaam sñiawbha wada pynman daka Jingiaseng Samla Balang Presbyterian Jowai.
