Kam chibynta wow lehwarom ya ka World Tuberculosis Month 2023, wei kammon wow pynkut ya kani ka kjut Tuberculosis (TB) chwa u 2025. Ka yung krehkaam ka District Tuberculosis Society, Jaiñtia Hills da pynman ko ya ka Street Play ha Khliehriat wow pynsñiawthooh paidbah chaphang kani ka kjut.
U W. Siangshai, Senior Technical Laboratory Supervisor (STLS), Khliehriat Tuberculosis Unit, da ong u wa ka Tuberculosis toh ka kjut wa mih na u khñiang Mycobacterium Tuberculosis wei man ko ka kjut kawa poor na bru ha bru. Da pyntip u leh chaphrang ka Pulmonary TB kawa ktah ya ki tharaw wa ka Extrapulmonary TB kawa ktah ya ki chyieñ wa kiwi ki bynta yong i dohjem.
U L.S. Manner, Senior Treatment Supervisor (STS), Khliehriat Tuberculosis Unit, da khana u hajrong ki dak ki chin yong kani ka kjut Tuberculosis deiwa kyntu ya ki paidbah wow lai cha ki Health Centre, Civil Hospital, CHC, PHC ha ka District wow phah Test lada em ki kani ka kjut khamtam manda em ky’oh palat ar tayaw, i iñdoh, i mihchit hei miet, i hiar i khia, i ky’oh dei snaam wa i wym bang-ja.
Da ong u wa kani ka kjut toh kawa ye u sumaar wei emkaam u dih dawai kamwa phah ki Doctor wei daw yoh ya ka poisa T. 500 chi bnai wow thied baam hadooh wa kut i por sumaar.
Hadien ka Street Play da chim ya ki kyntien kular wow pyndooh yei tieñ ya ka Tuberculosis, wow man ki bru wa syndong, ymtoh wow yoobeiñ ya ki bru wa em ya kani ka kjut wei wow pyndooh ya ka chwa u snem 2025.
