Jowai: Ynne ka sngi u President ka seiñ Hynniewtrep Achik National Movement (HANM) u Lamphrang Kharbani da wan u cha Jowai wow pynskem ya kiwa kitkaam yong ki ar tylli ki District Body ha ri-loom Jaintia, kiwa kynthup ya ka West Jaiñtia waka East Jaiñtia.
Ha kani ka yalang wa pynlai da u Damon S. Dkhar uwa man kam u General Secretary ka seiñ HANM-CB, da yoh leh yei klam na u President ka CB u Lamphrang Kharbani, uwa da e ki kyntien sneiñ kyntu ya ki dkhot kiwa em hapoh ka seiñ, deiwa ong wa toh u man ki ki khynroo wa tip bru tip Blai wa kiwa em akor ka burom neibynta wow chakri ya ka ri waka jaitbru.
Ha kani ka sngi ka seiñ da pynbaam smai ko ya ki ar ngut ki President u N.C. Shapdap kam u President ka East Jaiñtia wa ya u Elias Susngi kam u President ka West Jaiñtia, katwa ki Secretary won da man u Steady Shadap na West Jaiñtia wa u Shaniah Suchen na East Jaiñtia Hills, hei emlang ki dkhot ka seiñ.
Ka seiñ da pynsñiaw ko leh yei pyrchah hajrong wow pynkylla ya ka Sixth Schedule ka 2015 Sixth Schedule Amendment Bill, yong ka sorkar India kawa thmu wow pynpsiah ya ki kattu katni tylli ki kyndon kiwa ktah yei man tre ki jaitbru yong i kam ka shynchaar syiem, shynchaar Dolloi, synchaar Pator wa kiwi kiwi.
Ka seiñ da pyrchah ko ya ini i thmu ka sorkar pyrdi wow thap ya ki kyndon Part IX wa Part IX A kiwa yatoh waka Municipal wa Panchayat, kiwa ym yahap iyi iyi leh wa i synchaar tre ri yong i wei ka seiñ ka da pyrchah ko leh ya ka paragraph 3 (B) AB (I) yong ka Amendment Bill 2015 kawa thmu wow pynpsiah thymme ha ka Sixth Schedule ya ki Village Council wa Municipal Council, neibhah kini ki kyndon ym klam ki iyi iyi leh chaphang ki syiem ki dolloi, ki sordar ki nokma, waheh chnong wa ka dorbar shnong.
Kamtæ ka seiñ ka pyrchaah joor ko ya kini ki kyndon kiwa ka sorkar ka thmu ko wow pynpsiah hapoh ka Sixth Schedule neibhah daw ktah joor ko ya ka rukom synchaar khadar wa da em nadooh nachwa.
Discussion about this post