Dei rwai i chaad, i tem i put deilang i chet i baam pynkut ka Govt Girls HSS Jowai ya ka tayaaw lehkmen 

Ka tayaaw lehkmen ka Government Girls’ Higher Secondary School Jowai wa tip kam ka “Spirit week, one journey, many stories” kawa da sdang nadooh ka 5 tarik uni u bnai kam chibynta i dap 50 snem i lai luti ka skur, ha ka 8 tarik dapoi ko cha wakut hapyrdi i chongchit i ka-it ki khynnah skur wow chimbynta hei lehkmen waphær waphær nadooh i rwai i chaad, i tem i put wa kiwi de.

Ha kani ka tayaaw lehkmen ki khynnah skur da chimbynta ki u pynyoo sap ha ki jait yakob waphær waphær nadooh i yakob rwai, i yakob leh Debate, leh Quiz, thoh Essay, thoh Poetry, i yaleh Spelling Bee, Recitation, Extempore Speech wa kiwi kiwi.

Ha ka sngi pynkut najrong i yakob chaad yakob rwai, da em leh ka thaw wa da pynkhreh yow chet baam wei dai baam.

Ya kani ka sngi pynkut da wan wow pynhaap pyrda da u Principal ka Kiang Nangbah Govt. Higher Secondary School Jowai, u Rikidame Diengdoh uwa da ong wa ha ki 50 snem i lai luti kani ka skur ym mut du kat i boon snem donhi, tangwa da ye ko leh u pynwandur yei im ki khynnah skur nadooh i akor salon wa i em yei mynsien rai kut.

Da ong u leh kani ka skur ym du wa embynta hei wow e i stat i tip, tangwa da embynta haroh ko u pynwandur ya kiwa boon kiwa jooh puræ ha kani ka skur, kiwa da ye u su kylliang cha ka imlang sahlang ha kiwon kiwon ki bynta.

Wei ha uni u moomær dap 50 snem kyntu u wym toh du kat i lehkmen yeiwa dadep, tangwa toh u pait leh ya ka thong wa chakhmat neibynta iwa rap bha chooh chooh.

Da pynchongchit chooh chooh ya kani ka sngi pynkut dei wan chimbynta kiwa tem, kamjooh kiwa rwai.