Ha ka 30 tarik u Khonchonglad (Nov), ka KSU Kupli Area Circle da pynman ko yei thang mombati wa i duwai wa kyrpang neibynta ki mynsiem wa da khlaad ha chnong Mukroh hei chah siat yap ha ki pulit Assam.
Ya kani ka kynmoo warom da pynman ha madanbol Iooksi Kyanmynsar heipor 5:00 waje i janmiet deiwa emlang ki dkhot ka JSM waka FKJGP deilang wa kiwa yahkhmat chnong wa kiwa yahkhmat niam.
Ya ka yalang da pynlai da u Balawantei Suchiang, President ka KSU Kupli Area Circle wei da yoh yei klam na u J.C. Wanniang, i klam maitphang na u waheh chnong ka chnong Iooksi Kyanmynsar Thlongmoo, u Leonard Rabon wa na u Reebok Biam, President ka JSM Western Region uwa da beiñ joor yei kam ka KAAC wa kiwa chong chnong ka chnong Mukhroh toh kiwa chong chnong pyrchah aiñ, wei da dawa u wow tuklar yeini i klam u CEM ka KAAC da u CEM ka JHADC wow pyntikna wa toh ka chnong kawa haap pura haka jylla Meghalaya wa kammon nood ka KAAC wow kamtre.
Da yoh leh yei klam na u Embhah Passah, President ka FKJGP Iooksi Circle Area uwa da dawa naka sorkar Meghalaya wow e kreh ya ki manbei, ki khon wa ki waheh kiwa da dooh yei mynsien khnang u ye ki u pyndap pynbiang yaki khon wa dang khian khamtam haka puræ puthi.
U Leiki Richard Tyngkan, General Secretary ka KSU Kupli Area Circle da beiñ joor u ya ka sorkar MDA wa yahkhmat da ka NPP deiwa ong wa kani ka sorkar toh kawa mutlop ka wym kheiñsnep yei chah pynyap ki mynsien wa lui-lui kiwa sah ha khappood Assam wei ym e yada wa pura ya kiwa chong ha khappood Assam, katwa ya uwi pa uwi u Montri sorkar won da e 9-10 ngut ki pulit wow yada ya ki katwa ki paradoh parasnaam kiwa chong sier ha khappood da booh pulit du 3-4 ngut, wei ini i leh beinah ka sorkar ya kiwa sah ha khappood da pynkhtang ko ya kiwa chong chnong deiwa pynrap leh wa ka sorkar boonkaam du wow kdong ya kiwa yahkhmat seiñbhalang kiwa pynman yakhih ha sor tangwa ym em por ko wow pait ya kiwa chong khian mynsien ha khappood.
