Hadein wa duna i hiar slap, da sakhi wa u sarok ha ki chnong khapood wa ka ri Bangladesh ha East Jaiñtia Hills da boon kiwa da chah ktah, wei ini da pynbor i ya kiwa chong chnong wow lai luti ki na u sarok wa da oor wow lai lai thooh marbaam na ki yaw ki haat deiwa kit ya ki mar baam na ka yingkieñ wa da oor nadooh ka 17 tarik u Naisan wa em hajan ka chnong Shymplong.
Kini ki chnong wa da chah ktah hei oor u sarok, oor yingkieñ kynthup ki ya ka Shymplong, Borsora, Lejri, Lahalein, Huroi wa Hingaria.
Ki paidbah na kini ki chnong dei wym yohsa da hap ki u lai u kaap ya ka wah neidaw wa da oor ka yingkieñ wa em hajan ka chnong Shymplong iwa da booh hei maa ya ki bru neidaw wa tooid i khyndaw wei heh ka um.
Da chem chitom leh wa ha tymbud uni u sarok wa em i oor khyndaw wa ki moo heiwa da chah thyllem ki dieñ ha ka la’ær.
Hawa yaklam wa kiwa chong chnong ka thaaiñ, da pyntip ki wa ki tiar wow kreh ya ka yingkieñ da poi ki tangwa neidaw wa dang em u slap ympu ye wow sdang wow chna ya ka.
Neiliang ki paidbah ka thaaiñ da kyntu ki ya ki bor sorkar wow chimkhia yeini wow smat chna noh ya uni u sarok.
Kam wow pynkynmoo wa u DC ka East Jaiñtia Hills da pynkrehkaam u da ka Section 144 CrPC yow khang yei lai i wan kiwon kiwon ki kari ha kini ki bynta wa em kani ka yingkieñ wa da chah rah kamjooh yei pyrchang wow kaap cha chilliang dei kjat kamjooh leh da ki lieñ.
Puræ leh: Pynkrehkaam u DC da ka Section 144 ha ki bynta ka yingkieñ wa chah rah ha ka um
