Ka Angel’s Garden Park Committee chirup i krehlang wa ka GHM Guest House, Caroline Colony, Jowai da pynman ki ya i pynkhooid chnong ynne ka sngi kam chibynta wow pynneh pynsah ya i khooid i jngiar ha ka sarok Jowai Intermediary Bypass (Riat Mooleiñ) kamjooh i rood ka Wah Myntdu.
Ha kani ka sngi chwa wow sdang i pynkhooid da em ka yalang wa tbian hei emlang kiwa kitkaam ka Dorbar Chnong Caroline Colony Jowai, ki dkhot ka Environment Committee yong ka Dorbar Chnong Caroline Colony wa kiwa kitkaam ka Khooid Ya Ka Wah Myntdu.
Da emlang leh kiwa chong chnong ha lynter kani ka sarok nadooh na Yingkieñ Myntdu hadooh wapoi Liar Watula (Kyor) kawa haap hapoh u pood ka Dorbar Chnong Caroline Colony.
Ya ka yalang da pynlai da u Chairman ka Committee, u A.T. Gatphoh, da yoh yei klam na u K.L. Pariat, President KYWM, u Waheh Chnong ka Caroline Colony u Embhahlang Lyngdoh, katwa ya ki kyntien khublei da yoh na u G. Marshial Lamar.
Ya i jhep wa mih heipor i pynkhooid da pynyait jar jiar na kiwa py’ut wa ki wym py’ut chwa wow ekti noh ya ki cha ka Jowai Municipal Board.
