Kam chibynta i kynmoo burom ya ka National Sports Day, ynne ka sngi ki bor District ka West Jaiñtia Hills chirup wa ka yung krehkaam u District Sports Officer, West Jaiñtia da pynman ki da ka Inter School Indigenous Games Competition ha madan Kiang Nangbah Stadium, Jowai.
Ki jait yakob wa da pynman kynthup i ya ka Dat Moopoiñ wa ka yakob Yataan Tylle wa da chimbynta kynthai wa chynrang.
U K. Passah, DSO West Jaiñtia uwa man leh u Assistant Director, Sports & Youth Affairs ka sorkar jylla, hawa klam khana u wa ya ka National Sports Day ha uni u snem da sdang ki wow leh burom nadooh ka 26 tarik uni u bnai dei yalehke Badminton wei ha ka 31 tarik wow wan won daw em ka yalehke Sport ki khynnah khian neibynta ka Grassroots Football Centre.
Ynne ka sngi hadien wa kut ka yakob da saam khusnaam leh cha kiwa yoh nyngkong, wa ar wei wa le.
Ha ka yakob Dat Moopoiñ ki kynthai, da jop ka H.K. Singh Memorial Secondary School Jowai, wa ar ka Kiang Nangbah Govt. Higher Secondary School Jowai, wa le won ka QC Springside Higher Secondary School.
Ha i Dat Moopoiñ ki chynrang, da jop ka Mihmyntdu RC Secondary School, wa ar ka Marian Hills Higher Secondary School wa le won ka Jaiñtia Higher Secondary School.
Hei yakob Yataan Tylle ki kynthai, da jop ka H.K. Singh Memorial Secondary School Jowai, wa ar ka Jaiñtia Higher Secondary School Jowai, wa le won ka Marian Hills Higher Secondary School Jowai.
Hei Yataan tylle ki chynrang won da jop ka Jaiñtia Higher Secondary School Jowai, wa ar ka Kiang Nangbah Govt. Higher Secondary School Jowai, wa le won ka Marian Hills Higher Secondary School Jowai.
Discussion about this post