Jowai: Ka Dorbar Chnong Mynthong, Jowai hajrong i angnood wow ye u yakhun yei sih wa boonjait haka chnong ka thaw kamjooh haka imlang sahlang hi waroh kawi, ynne ka sngi deiwa yakrehlang chirup waki bor pulit ka Jowai Police Station da pynman ko yei pynsñiawthooh paidbah kawa tip kam ka “Awareness Programme on Management & Control of COVID-19 Pandemic, Drug Trafficking & Addiction, POSCO and General Law & Order”.
Haka yalang wa pynlai da u waheh chnong ka Mynthong u L. Pohktai wa pynman ha Community Hall ka chnong, neiliang ki bru wa chemphang wa wan naka chnat pulit da batai pynsñiawthooh ki hajrong ki aiñ, ki kyndon waphær waphær wa ki paidbah emkaam ki u bood yow ye yakhun yei sih wa boonjait haka imlang sahlang.
U SI R. Dhar hawa e yei klam hajrong ka Community Management of COVID-19, da kyntu u yaki paidbah wow man kiwa syndong bha ha kam kini ki por wa uni u khñiang da sdang u wow poor, deiwa bood ryntih yaki kyndon ka sorkar deiwa deiñ yaki Mask, u yajngai para bru, nalor wow sait khooid ya ki kti wa kiwi kiwi.
Heiyatoh wa ka Cyber Crime, neiliang u SI A. Phawa khana u ya kiwa boon ki jait chah thok wa ki bru da ngat ki lyngba ki Social Media lyngba ka Facebook, Email neitæ lyngba ki SMS, ki bru wa chukor deiwa Phone, nalor ki jait chah maham chah pyndik wa kiwi kiwi. Kamtæ kyntu u wow kiar u dam u ngait ya kiwon kiwon ki SMS, ki bru wa Phone yow lait nei chah thok, heijooh i por u wan ujor leh cha ki pulit.
Ka WPS R.M. Suchiang da pynche ko hajrong ka aiñ POCSO Act, ka aiñ wa yada nei chah thombor ki kynthai wa ki khynnah wa hapoh 18 snem kamjooh kawa pynchitom ya kiwa thombor. Da ban joor ko heiyatoh waki kynthai neidaw wa i kaam chah slaitbor nang joor ki kat dang mih ki sngi wot pyn ha kiwa hayung hasem.
Hawa pynsñiaw yaki aiñ wa yatoh yaki kynthai, da kyntu haroh ko yaki chynrang wym hoi u ya chongkha ki waki kynthai wa hapoh 18 snem neibhah daw man i saja yaki wei ka aiñ leh da klam che ko wa lym pu palat ka kynthai 18 snem daw ngat ki hei chah pynchitom.
U SI A. Wahlang won hawa klam hajrong ka phang “Drug Addiction and Role of Dorbar Shnong and Community to Control the Menace”, ong u wa i eh haka pateiñ katni u yakhun yow drugs toh na i daw wa ki khynnah suk bha ki wow yoh poisa, wei sa iwi leh i em ki Mobile Phone pynsuk bha ko yaki u yoh drugs.
Yow yakhun yeini ong u wa nyngkong hi toh ka yung ka sem heiwa kam ka yung emkaam u pait bha ko wa kammon ki khon ki kti lai wan ki, wa i kylla hei rukom man yong ki. Iwa ar toh ka chnong ka thaw heiwa kam ki bor chnong emkaam u pait siar bha ki yaki kdong ki chmiang, ki thaw wa doom iwa ye u man ki thaw wow yohlaad ki u leh yei kaam wa sih.
Da ong haroh u wa boonsien hi kam kini ki jait dih wa sih sdang ki nei yachem lok deiwa sdang u dih yei kiad, biri sikret wa kiwi kiwi, kiwa man kam ka luti wa khian wa ye u yah chei dih drugs. Wei mynda ngop da man i eh yaki u kiar wei ini wanrah ko sa i sih wa boonjait won haka imlang sahlang.
Kamtæ kyntu u wa lada chem ya kam kini ki bru, emkaam u pyntip cha ki bor ka aiñ, wei i rukom pynchitom yaki leh chong ha i jait drugs wa yoh kem.
Katwa neiliang u B.R. Marak, OC ka Jowai Police Station won hawa e yei klam heiyatoh waka “General Law and Order”, da ong haroh u, “Hawa pait yei man i long ki bru katni da kheiñstiñ bha ki u bood yaki kyndon yada now khñiang Corona, deiwa deiñ Mask iwa da yoo la kamwa da pynman khñiang Corona ki yaki pulit neibhah chi yoo ki yaki pulit deiñ Mask wot ki, ha wym yoo pulit won te looid ki. Ini pynyoo wym em tieñ Corona ki, tieñ ki yaki pulit”.
