Kam chibynta ka National Sports Day wow kynmoo burom ya uwa yalehke Hockey wa pawnaam yong ka ri, u Major Dhyan Chand Singh, kamtæ ha West Jaiñtia Hills District leh lyngba ka yung krehkaam u District Sport Officer da leh burom ki ya kani ka sngi deiwa pynman da ka yakob ki yalehke tynre wa kynthup ka Yataan Tylle waka Dat Moo Niaw ha Kiang Nangbah Stadium, Jowai ynne.
Ha kani ka yalehke da wan chimbynta daki khynnah skur naki 6 tylli ki skur hapoh ka District.
Yei naam jop haka yataan tylle yong ki kynthai da yoh nyngkong ka H.K. Singh Memorial Secondary School Jowai, wa ar ka Seiñraij Higher Secondary School, wa le won ka Govt. Girls Higher Secondary School.
Hei yataan tylle yong ki chynrang won da yoh nyngkong ka Seiñraij Higher Secondary School, wa ar ka Govt. Boys Higher Secondary School wa le won ka Tpep Pale Secondary School.
Neitæ hei ya dat moo niaw yong ki kynthai won da jop ka H.K. Singh Memorial Secondary School, wa ar ka Tpep Pale Secondary School wa le won ka Seiñraij Higher Secondary School.
Hei yakob yong ki chynrang won da yoh nyngkong ka Lumpyrtuh Secondary School, wa ar ka Tpep Pale Secondary School wa le won ka Jaiñtia Higher Secondary School.
Neiliang u K. Passah, District Sport Officer, WJH pyntip u wa heiyatoh wa kani ka National Sports Day, ka sorkar jylla leh lyngba ka chnat Sports and Youth Affairs chim ko ka luti wow lehkmen ya kani ka sngi deiwa pynman ki yalehke Sport tynre waphær waphær ha kylleiñ ki District, wei ha West Jaiñtia Hills da pynman ki dei yakob yataan tylle wa ka dat moo niaw.
Heijooh i por chim u leh ka kabu wow e khublei National Sport Day ya waroh kiwa maya Sport hapoh ka District kynthai wa chynrang.
