Ka Dorbar Chnong Khimusniang, Jowai da pyntip ko wa kam chibynta ka yalap Election MLA 2023 da rai wow booh kawi ka rynsan ya waroh ki kyrtong wow ya emlang ki ha ka jooh ka sngi kawa tip deiwi i kyntien kam ka “Common Platform”.
Ya kani ka yalap Election u pynman ha ka 09-02-23 heipor 7:00 waje i miet deiwa chah du 5 ngut ki bru kiwa na baar wa kynthup ya u kyrtong wa ar tylli ki kari wei kani ka yalang u man ko neibynta kiwa chong chnong ka Khimusniang.
Ka chnong da maham ko leh ya ki seiñ saiñpyrthai namo ki Political Party wym toh u saam poisa ki ha chnong wei lada chem ya kiwon kiwon kiwa tyngkheiñ aiñ chnong daw pynchitom katkam ka aiñ yong ka chnong wei heijooh i por leh daw e cha ki bor ka chnong.
Ka chnong da khang pyrchah ko leh ya ki tre chnong kamjooh kiwa na baar chnong wow tem pynheh sur hapoh kari wei wow chaad cha wah chaneiñ hapoh ka chnong.
Da kyrpaad ya ki kyrtong wow sñiawbha u burom wei wow kohngooh ya kani ka rai ka Dorbar Chnong khnang wa ini i kaam u man ko kawa lai ryntih
Kamwa wow pynkynmoo wa ka Dorbar Chnong Khimusniang ha u snem 2019 neibynta ka Election MDC da pynman ko da kani hi ka Common Platform yow yalap Election deiwa emlang waroh ki kyrtong ha ka jooh ka sngi hei jooh i por.
Puræ leh: Ha ka Common Platform ka Khimusniang wan pynsñiaw waroh 6 ngut ki kyrtong ka Jowai South
